एजेन्सी – विश्वको सबैभन्दा प्रतिष्ठित द एसेश सिरिजको दोस्रो खेलमा इंग्ल्यान्डले मजबुत ब्याटिङ प्रदर्शन गरेको छ । दोस्रो दिनको खेल सकिँदा इंग्ल्यान्ड २७८-४ को अवस्थामा छ ।

इंग्ल्यान्डका ह्यारी ब्रुक ५१ बलमा ४ चौकासहित ४५ र बेन स्टोक्स १७ रनमा नट आउट छन् । इंग्ल्यान्ड समग्रमा पहिलोे इनिङमा १ सय ३८ रनले पछिछ ।

पहिलो विकेटका लागि ओपनर ज्याक क्रली र बेन डकेटले ९१ रनको साझेदारी गर्दै राम्रो सुरुवात दिलाएका थिए । क्रली ४८ बलमा ५ चौकासहित ४८ रनमा नाथन लायनको बलमा स्टम्पिङ आउट भए ।

अर्का ओपनर बेन डकेट १ सय ३४ बलमा ९ चौकासहित ९८ रनमा आउट भए । उनी जोश हेजलवुडको बलमा डेविड वार्नरबाट दुई रनमा क्याच आउट भएपछि शतक बनाउन चुकेका थिए ।

ओली पोप ६३ बलमा ४ चौकासहित ४२ र जो रुट १० रनमा आउट भए । मिचेल स्टार्कको बलमा जो रुट स्मिथबाट उत्कृष्ट क्याच आउट भएका थिए । उक्त क्याच केहि विवादित समेत बनेको थियो ।

त्यसअघि पहिलो इनिङमा अष्ट्रेलिया दास्रो दिन पहिलो सेसनमा ४ सय १६ रनमा अल आउट भएको थियो । अष्ट्रेलियाका पूर्वकप्तान स्टिभ स्मिथले १ सय ८४ बलमा १५ चौकासहित १ सय १० रनको शतकीय इनिङ खेले । उनको यो टेस्ट करिअरको ३२ औं शतक हो । ट्रविस हेड ७३ बलमा १४ चौकासहित ७७ रनमा आउट भए ।

ओपनर डेविड वार्नर ८८ बलमा ८ चौका र १ छक्कासहित ६६, उस्मान खवाजा १७, मार्नस लाबुसेन ४७, क्यामरन ग्रिन डक, एलेक्स केरी २२, नाथन लायन ७ र जोश हेजलवुड ४ रनमा आउट भए । प्याट कमिन्स ४३ बलमा २ चौकासहित २२ रनमा नट आउट रहे ।

इंग्ल्यान्डका ओली रोविन्सन र जोश टोंगेले समान तीन विकेट लिए । जो रुटले दुई, जेम्स एन्डरसन र स्टुअर्ट ब्रोडले समान एक विकेट लिए । पाँच टेस्ट खेलको सिरिजमा अष्ट्रेलिया १–० ले अघिछ ।