एजेन्सी – श्रीलंकाका स्पिनर वानिन्दु हसरंगाले जिम्बावेमा जारी विश्वकप छनोटमा तीन खेलमा १६ विकेटका साथ दुर्लभ विश्व कीर्तिमान बनाएका छन् । हसरंगा ओडिआई इतिहासमा लगातार तीन पटक पाँचमाथि विकेट लिने विश्वकै पहिलो स्पिनर बनेका छन् । ओडिआईमा लगातार तीन पटक पाँचमाथि विकेट लिने उनी विश्वकै दोस्रो बलर हुन् ।

उनीअघि पाकिस्तानका तीव्र गतिका बलर वाकर युनिसले सन् १९९० को नोभेम्बरमा वेस्टइन्डिज र न्युजिल्यान्डसँग गरि लगातार तीन पटक पाँचमाथि विकेट लिएका थिए । यी दुई बलर बाहेक अन्य कुनैपनि खेलाडीले ओडिआईमा लगातार तीन पटक पाँचमाथि विकेट लिन सकेका छैनन् ।

वानिन्दुले पहिलो खेलमा युएईलाई १ सय ७५ रनले हराउन ८ ओभरमा १ मेडनसहित २४ रन खर्चेर ६ विकेट लिएका थिए । त्यस्तै उनले दोस्रो खेलमा ७.२ ओभरमा २ मेडनसहित १३ रन खर्चेर ५ विकेट लिएका थिए । उनले आयरल्यान्डविरुद्ध १० ओभरमा ७९ रन खर्चेर ५ विकेट लिएका थिए ।

समूह बी मा रहेको श्रीलंका एक खेल अगावै सुपर सिक्समा पुगेको छ । श्रीलंकाले अन्तिम खेल मंगलबार स्कटल्यान्डसँग खेल्नेछ । उक्त खेलमा विजयी भएमा श्रीलंका ४ अंकका साथ सुपर सिक्समा जानेछ । सुपर सिक्समा समूह ए बाट वेस्टइन्डिज, जिम्बावे र नेदरल्यान्ड्स पुगेकाछन् ।

समूह बी बाट ओमान, स्कटल्यान्ड र श्रीलंका सुपर सिक्समा पुगेका छन् । शीर्ष दुई टोलीले आगमी अक्टोबर नोभेम्बरमा भारतमा हुने एकदिवसीय विश्वकप खेल्न पाउनेछन् ।