एजेन्सी – अन्तर्राष्ट्रिय क्रिकेट परिषद् (आइसिसी) ले अमेरिकाका तीव्र गतिका बलर कायल फिलिपलाई निलम्बन गरेको छ । नियमविपरित बलिङ एक्सनको कारण उनलाई निलम्बन गरेको आइसिसीले जनाएको छ ।

२६ वर्षीय उनलाई वेस्ट इन्डिजसँगको खेलको क्रममा म्याच रेफ्रीले बलिङ एक्शन रिपोर्ट गरेका थिए । उनले आफ्नो बलिङ एक्शन नसुधारे सम्म पुन बलिङ गर्न पाउने छैनन् । नेपालविरुद्ध डेब्यू गर्दै तीन विकेट लिएका उनले पछिल्लो खेल विश्वकप छनोटमा नेपालविरुद्ध नै खेलेका थिए ।

उनले ५ ओडिआई खेलमा ६ विकेट लिएका छन् । आइसिसी विश्वकप लिग २ मा २०२१ सेप्टेम्बरमा नेपालविरुद्ध डेब्यू गर्दै तीन विकेट लिएका थिए । विश्वकप छनोटमा उनले ७ ओभरमा ४९ रन खर्चिदा विकेट लिन सकेका थिएनन् । वेस्ट इन्डिजविरुद्ध उनले ९.३ ओभरमा १ मेडनसहित ५६ रन खर्चेर ३ विकेट लिएका थिए । कायल मेयर्स, जेसन होल्डर र अल्जारी जोशेफको विकेट लिएका थिए ।

यता अमेरिकाका तीव्र गतिका बलर अली खान दुई खेल प्रतिबन्धबाट नेदरल्यान्ड्सको खेलबाट पूनरागमन गरेका थिए । खराब अनुशासन र सेलेब्रेसनको कारण ४ डीमेरिट प्वाइन्ट पाएपछि उनले नेपाल र वेस्टइन्डिजसँगको खेल गुमाउनु परेको थियो ।
अमेरिका वेस्टइन्डिजसँग ३९ रन, नेपालसँग ६ विकेट र नेदरल्यान्ड्ससँग ५ विकेटले पराजित हुँदै बाहिरिएको छ । अन्तिम खेल अमेरिकाले शनिबार जिम्बावेसँग खेल्नेछ ।