कामाडौं (हाम्रो खेलकुद) – नेपाल आइसिसी विश्वकप छनोटमा बिहीबार चार पटकको विश्वकप विजेता वेस्ट इन्डिजसँग १ सय १ रनको फराकिलो अन्तरले पराजित भयो । जितको लागि ३ सय ४० रनको विशाल विजयी लक्ष्य पछ्याएको नेपाल २ सय ३८ रनमा अल आउट भयो ।

स्तर अनुसार नेपालको हार अपेक्षित र स्वभाविक थियो । तर टस जितेको नेपालले बलिङमा जुन सुरुवातका गरेको थियो त्यसलाई निरन्तरता दिएको भए विश्व विजेता वेस्ट इन्डिजलाई स्तब्ध पार्दै विश्वमा तहल्का पिट्न सक्थ्यो । तर त्यो दबाब धेरै समय मैदानमा देखाउन सकेन । नेपालले आफैं केहि गल्ती पनि गर्यो ।

ती गल्ती पछि गएर हारको प्रमुख कारण समेत बन्यो । क्रिकेटमा कुनैपनि भर हुँदैन । नेपालको सुरुवातले त्यो देखाएको पनि थियो । वेस्टइन्डिजसँगको खेलबाट नेपालले हार जित भन्दा पनि धेरै कुराहरु सिक्नेछ । जुन आगमी दिनमा धेरै फाइदा मिल्नेछ । नेपालले वेस्ट इन्डिजसँग हार्नुको पाँच प्रमुख कारण भने यस प्रकार छन् ।

५. ठूलो स्कोरको मानसिक दबाब

नेपाललाई वेस्टइन्डिजले ३ सय ४० रनको विशाल लक्ष्य दिएको थियो । नेपालले आफ्नो इतिहासमा २ सय ८६ रन भन्दा ठूलो योगफल नै पूरा गरेको थिएन । त्यो पनि चार महिना अघि टियु क्रिकेट मैदानमा नामिबियाविरुद्ध पूरा गरेको थियो ।

नामिबिया र नेपाल एकै स्तरका टोली हुन् । वेस्टइन्डिजको उत्कृष्ट बलिङ आक्रामण सामु उक्त विशाल लक्ष्य नेपालले ब्याटिङ गर्नु अघि नै हार पक्का बनेको थियो । नेपालले कम योगफलमा रोक्न सकेको भए मानसिक दबाब कम हुन्थ्यो । केहि समय बल डट खेलेर भएपनि पूरा गर्न सक्थ्यो ।

भीम सार्कीको स्कुप सट बोर्डको स्कोर बोर्डको दबाबको एक कारण थियो । सुरुवातमै स्कोर बोर्डको दबाब परेपछि ब्याटरको मनोबल पनि घटेको थियो । नेपाल खेल जित्न भन्दा पनि अन्तिम सम्म खेलेर रनको अन्तर घटाउदै नेट रनरेटमा कम असर पार्न चाहन्थ्यो ।

४.राम्रो सुरुवात गर्न नसक्नु

विशाल लक्ष्य पूरा गर्न ब्याटिङमा सानदार सुरुवात गर्नुपर्छ । पावर प्लेमा नेपालले आक्रामकका साथ विकेट नदिई उत्कृष्ट सुरुवात गरेको भए वेस्ट इन्डिज खेलमा दबाबमा पर्न सक्थ्यो ।

राम्रो लयमा रहेका कुशल भुर्तेल दोस्रो ओभरमै पाँच रनमा बोल्ड आउट भए । भीम सार्की स्कुप खेल्ने धुनमा २ रनमा आउट भए । १२ औं ओभरमा आसिफ शेख सट बलमा २८ रनमा क्याच आउट भए । त्यो समय नेपाल ४८–३ को अवस्थामा पुगेको थियो ।

३ सय ४० रनको लक्ष्य नेपालले मात्रै होईन यस्तो सुरुवातले वेस्टइन्डिजविरुद्ध विश्वका कुनैपनि टोलीलाई भेट्टाउन मुश्किल पर्छ ।

३. बाउन्स र शर्ट बल खेल्न नसक्नु

वेस्टइन्डिजका तीव्र गतिका बलरकोे बाउन्सर र शर्ट बल सामु नेपाली ब्याटर क्रिजमा टिक्न सकेनन् । त्यसैले नेपाली ब्याटरले खराब प्रदर्शन गरेका थिए । किमो पलको सर्ट बलमा आसिफ शेखले स्लिपमा कायल मयर्सलाई क्याच दिए ।

कप्तान रोहित पौडेल होल्डरको बाउन्सर बलमा सम्हाल्लिन नसक्दा डीप फाइन लेगमा वैकल्पिक फिल्डर केसी कार्टीबाट क्याच आउट भए ।

अल्जारी जोशेफको सर्ट बलमा आरिफ शेख निकोलस पुरनबाट थर्डमा क्याच आउट भए । नेपालका सबै ब्याटरले बाउन्स र सर्ट बलमा निकैं संघर्ष गर्नुपर्यो । नेपालको ठूलो कमजोरीको रुपमा देखापर्यो । त्यो नै नेपालको हारको एक कारण बन्यो ।

२. होप र पुरनको साझेदारी समयमै तोड्न नसक्नु

एक समय वेस्टइन्डिज १५.३ ओभरमा ५५–३ को अवस्थामा थियो । यो समय सम्म नेपालले खेलमा वेस्टइन्डिजलाई दबाबमा राखेको थियो । पुरन र शाई होपको विकेट समयमै लिन सकेको खण्डमा नेपालले वेस्टइन्डिजलाई २ सय ५० को आसपासमा रोक्न सक्थ्यो ।

यी दुई ब्याटरपछि होल्डर र रोभम्यान पावेल क्रिजमा आउने थिए । त्यो दबाबमा खेल्न सहज हुने थिएन । दबाबमा सस्तैमा आउट हुनसक्थे । चौथो विकेटका लागि पुरन र होपले २ सय १६ रनको दोहोरो शतकीय साझेदारी गरेका थिए ।

त्यो साझेदारीले नै वेस्टइन्डिजले विशाल योगफल बनाएको थियो । पुरनले १ सय १५ र होपले १ सय ३२ रनको शतकीय इनिङ खेले । नेपालले समयमै उक्त साझेदारी तोडेन सकेको भए सायद नतिजा अर्कै सक्थ्यो ।

१. पुरनलाई दुई जीवनदान

नेपाललाई निकोलस पुरनको दुई क्याच छाड्नु खेलमा ठूलो भारी पर्यो । दुबै क्याच विकेटकिपर आसिफ शेखले छाड्न पुगेका थिए । स्पिनर ललित नारायण राजवंशीको बलमा एज लागेको सहज बल आसिफले ब्यक्तिगत १७ औं ओभरको अन्तिम बलमा क्याच छाडेका थिए ।

करण केसीको ३४ औं ओभरको चौथो बलमा एज लागेको बल आसिफले ५४ रनमा पुन छाड्न पुगेका थिए । त्यसै ओभरमा करणले उत्कृष्ट योर्करका साथ पुरनलाई दबाबमा राखेका थिए । तर नेपालले पुरनलाई दुई जीवनदान दियो ।

त्यो नै ठूलो भारी पर्यो । पुरन वर्तमान समयका विश्व क्रिकेटकै एक उत्कृष्ट फिनिसर हुन् । त्यसैको कारण उनलाई आइपिएलमा यसै सिजन लखनऊ सुपर जायन्ट्सले १६ करोड भारु (२५ लाख नेपाली रुपैयाँ) अक्सनमा खर्चेर किनेको थियो ।

पुरनले नेपालविरुद्ध ९४ बलमा १० चौका र ४ छक्कासहित १ सय १५ रनको शतकीय साझेदारी गरे । कप्तान होपसँग दोहोरो शतकीय साझेदारी गरे । वेस्टइन्डिजबाट वर्तमान टोलीमा सबैभन्दा राम्रो स्पिन खेल्ने पुरनलाइ जीवनदान दिनु हारको प्रमुख कारण बन्यो ।