काठमाडौं (हाम्रो खेलकुद) – नेपालले आइसिसी एकदिवसीय विश्वकप छनोट २०२३ को पहिलो खेलमा आइतबार घरेलु टोली जिम्बावेसँग खेल्दैछ । खेल नेपाली समय अनुसार दिउँसो १२ : ४५ मा हरारे स्पोर्ट्स क्लबमा सुरु हुनेछ ।

घरेलु टोली जिम्बावे नेपालमाथि जितका साथ सुरुवात गर्न चाहन्छ । उत्कृष्ट लयमा रहेको नेपाल जिम्बावेलाई स्तब्ध पार्दै सनसनी मच्चाउन चाहन्छ । तर टेस्ट टोलीविरुद्ध सहज भने हुनेछैन । जिम्बावेलाई हराउन नेपालले आफ्नो क्रिकेट इतिहासकै उत्कृष्ट क्रिकेट खेल्नुपर्ने हुन्छ । नेपालले २०१८ मा जिम्बावेमा सम्पन्न आइसिसी एकदिवसीय विश्वकप छनोटको प्लेअफमा पपुवा न्युगिनीलाई हराउँदै ओडिआई मान्यता पाएको थियो ।

नेपालले हालसम्म ५१ ओडिआई खेल खेलेको छ । नेपालले पहिलो पटक टेस्ट टोलीविरुद्ध ओेडिआई खेल्दैछ । पछिल्लो पटक विश्वकप छनोटमा भएका दीपेन्द्रसिंह ऐरी, सोमपाल कामी, करण केसी, सन्दीप लामिछाने, ज्ञानेन्द्र मल्ल, रोहित पौडेल, ललितनारायण राजवंशी र आरिफ शेख अहिले पनि टोलीमा छन् ।

करण बाहेक अन्य ७ खेलाडीले जिम्बावेविरुद्ध खेल नै खेलेका थिए । स्पिनर सहयोगी आशामा नेपालले त्यस समय करणलाई बेन्चमा राखेर ललित राजवंशीलाई डेब्यू दिएको थियो । नेपाल र जिम्बावेबीच एक मात्रै लिष्ट ए अर्थात ५० ओभरको खेल भएको छ । २०१८ को विश्वकप छनोटमा जिम्बाबेले नेपाललाई १ सय १६ रनले हराएको थियो ।

क्विन्स स्पोर्ट्स क्लब बुलावायोमा टस जितेर पहिला ब्याटिङ रोजेको जिम्बावेले निर्धारित ५० ओभरमा ६ विकेट गुमाउँदै ३ सय ८० रन बनाएको थियो । जिम्बावेका सिकन्दर राजाले ६६ बलमा ७ चौका र ९ छक्कासहित सर्वाधिक १ सय २३ रनको विष्फोटक शतकीय इनिङ खेलेका थिए ।

ब्रेन्डन टेलरले ९१ बलमा ७ चौका र १ छक्कासहित १ सय रन बनाएका थिए । नेपालका सोमपाल कामीले ८ ओभरमा ८२ रन खर्चेर २ विकेट लिएका थिए । बसन्त रेग्मीले १० ओभरमा ६९ रन खर्चेर २ विकेट लिएका थिए । सन्दीपले १० ओभरमा ६७ रन खर्चेर १ विकेट लिएका थिए । उक्त विजयी लक्ष्य पछ्याएको नेपालले निर्धारित ५० ओभरमा ८ विकेट गुमाउँदै २ सय ६४ रन बनाएको थियो । नेपालका आरिफ शेखले ५० र शरद भेषावकरले ५२ रन बनाएका थिए ।

नेपालले जिम्बावेसँग दुई टि२० आई खेल खेलेका छ । दुबै खेलमा पराजित भएको छ । २०१९ मा नेपाल, जिम्बावे र सिंगापुरबीच टि२० आई त्रिकोणात्मक सिरिज भएको थियो । सिंगापुरमा सम्पन्न उक्त टि२० आईमा नेपाल जिम्बावेसँग ५ विकेट र ४० रनले पराजित भएको थियो । टि२० आईबाट दीपेन्द्र, आरिफ, कुशल, सोमपाल, करण र सन्दीप अहिले टोलीमा छन् । नेपालले जिम्बावेसँग अन्य खेल भने खेलेको छैन ।