राकेश तिमल्सिना
चितवन – काठमाडौँको हर्टल्यान्ड कलेज चौथो क्याची एसएसपी कप क्रिकेट प्रतियोगिता सेमिफाइनलमा पुगेको छ । बुटवलको वेस्टर्न क्रिकेट एकेडेमीलाई ६ विकेटले हराउँदै हर्टल्यान्ड नेट रनरेटको आधारमा समुह डी को बिजेता रुपमा अन्तिम चारमा पुगेको हो ।

विशाल चोकको नौ बिगाहा मैदानमा ९३ रनको सामान्य लक्ष्य पछ्याएको हर्टल्यान्डले ११. ४ ओभरमा ४ विकेटको क्षेतिमा जित निकाल्यो । सेमिफाइनल प्रवेशका लागि हर्टल्यान्डले १३.३ ओभरमा जित्नै पर्ने थियो । हर्टल्यान्डलाई जित दिलाउन दिनेश आग्रीले सर्वाधिक ४० रन बनाएका थिए । २१ बल खेलेका उनले ४ छक्का र ३ चौका प्रहार गरे । त्यस्तै, कप्तान भिम सार्कीले ३५ र अरुण ऐरीले १४ रन जोडे । बलिङतर्फ वेस्टर्नका विष्णु पाण्डेयले २ विकेट लिए ।
त्यसअघि टस जितेर ब्याटिङ राजेकोे वेस्टर्नले १९.२ ओभरमा सबै विकेट गुमाउदै ९२ रनमा रोकियो । वेस्टर्नका लागि रोहित पौडेलले २१, विजय सुनारले १९ र शाहा आलमले १७ रन बनाए । वेस्टर्नलाई कम स्कोरमा समेट्ने क्रममा हर्टल्यान्डका अरुण ऐरीले ४ विकेट लिए । अलराउन्ड प्रदर्शन गरेका अरुण खेलको म्यान अफ द म्याच घोषित भए ।

क्याची एसएसपी कपमा सोमबारको सेमिफाइनल
कृषि तथा वन विश्वविद्यालय, रामपुरविरुद्ध क्यापिटल कलेज, काठमाडौं
भरतपुरको ग्रेस वीरेन्द्रविरुद्ध काठमाडौँको हर्टल्यान्ड कलेज