एजेन्सी – इंग्ल्यान्डका युवा ब्याटर ओली पोपले आयरल्यान्डसँगको एकमात्रै टेस्ट खेलमा सानदार दोहोरो शतक हानेका छन् । लड्समा दोस्रो दिन दोस्रो सेसनमा पोपले आफ्नो अन्तर्राष्ट्रिय क्रिकेट करिअरको पहिलो दोहोरो शतक हानेका हुन् ।

उनले २ सय ७ बलमा दोहोरो शतक पूरा गरेका थिए । पोपले एन्डी म्याकबर्नीलाई छक्का हान्दै दोहोरो शतक पूरा गरेका थिए । दोहोरो शतक पूरा गरेको अर्को बलमा भने उनी विकेटकिपर लोर्कान टकरबाट क्याच आउट हुन पुगे । ओली पोपले २ सय ८ बलमा २२ चौका र ३ छक्का सहित २ सय ५ रनको सानदार दोहोरो शतकीय इनिङ खेले ।

इंग्ल्यान्डले पहिलो इनिङमा ५२४/४ को अवस्थामा समाप्ति घोषणा गर्यो । इंग्ल्यान्डले पहिलो इनिङमा ३ सय ५२ रनको विशाल अग्रता लिएको छ । इंग्ल्यान्डका अर्का ओपनर बेन डकेट १ सय ७८ बलमा २४ चौका र १ छक्कासहित १ सय ८२ रनमा आउट भए । उनी ग्राहम हुमेको बलमा बोल्ड भएका थिए । ओपनर ज्याक क्रली ४५ बलमा ११ चौकासहित ५६ रनमा आउट भएका थिए ।

पहिलो विकेटका लागि डकेट र क्रलीले १ सय ९ रनको शतकीय साझेदारी गरेका थिए । दोस्रो विकेटका लागि डकेट र ओली पोपले २ सय ५६ रनको दोहोरो शतकीय साझेदारी गरेका थिए ।

त्यसअघि टस हारेर पहिला ब्याटिङको निम्तो पाएको आयरल्यान्ड पहिलो दिनमै १ सय ७२ रनमा अल आउट भएको थियो । आयरल्यान्डका जेम्स म्याकुलम ३६ र कर्टिस क्याम्फर ३३ रनमा आउट भएका थिए । इंग्ल्यान्डका स्टुअर्ट ब्रोडले सर्वाधिक ५ विकेट लिएका थिए । ज्याक लेचले ३ र म्याथ्यु पट्सले दुई विकेट लिए ।