एजेन्सी – साविक विजेता गुजरात टाइटन्सले इन्डियन प्रिमियर लिग (आइपिएल) २०२३ को फाइनलमा चेन्नई सुपर किंग्सविरुद्ध राम्रो ब्याटिङ गरेको छ । नरेन्द्र मोदी स्टेडियम अहमदाबादमा टस हारेर पहिला ब्याटिङ थालेको घरेलु टोली गुजरातले ८ ओभरमा १ विकेट गुमाउँदै ७२ रन बनाएको छ ।

गिल २० बलमा ७ चौकासहित ३९ रनमा आउट भए । ऋद्धिमान शाह २५ बलमा २ चौका र १ छक्कासहित ३१ र साई सुदर्शन २ रनमा क्रिजमा साथ दिनेछन् । गिलले यस सिजनमा १७ खेलमा ३ शतक र ४ अर्धशतकसहित कुल ८ सय ९० रन बनाउँदै ओरेन्ज क्याप जित्ने पक्का भएको छ।

गुजरातका प्रमुख ब्याटर शुभमन गिलले दोस्रो ओभरमै ठूलो जीवनदान पाए । तुषार देशपान्डेको दोस्रो ओभरको चौथो बलमा दीपक चाहरले ब्यक्तिगत तीन रनमा ब्याकवार्ड स्क्वायरमा सहज क्याच छाडेका थिए ।

गिलले पुन १७ रनमा जीवनदान पाएका थिए । दीपक चाहर पाँचौं ओभरको पहिलो बलमा गिललाई कट एन्ड बोल्ड आउट गर्ने अवसर गुमाएका थिए । सातौं ओभरको दोस्रो बलमा जडेजाले गिललाई ३६ रनमा रन आउट गर्ने अवसर चुकाएका थिए । गुजरातले पहिलो पावर प्लेमा ६२ रन जोडेको थियो ।

गिल जडेजाको सातौं ओभरको अन्तिम बलमा धोनीबाट स्टम्पिङ आउट भए । जडेजाको बल मिस भएपछि धोनीले उत्कृष्ट स्टम्पिङका साथ पहिलो विकेट चेन्नईलाई दिलाएका हुन् । पहिलो विकेटका लागि गिल र ऋद्धिमान शाहले ७ ओभरमा ६७ रनको साझेदारी गरेका थिए ।