एजेन्सी – तीव्र गतिका बलर आकाश माधवालले घातक बलिङ गरेपछि पाँच पटकको च्याम्पियन मुम्बई इन्डियन्स इन्डियन प्रिमियर लिग (आइपिएल) २०२३ को दोस्रो क्वालिफायरमा पुगेकोछ।

मुम्बईले एलिमिनेटर खेलमा लखनऊ सुपर जायन्ट्सलाई ८१ रनले हराउँदै दोस्रो क्वालिफायरमा गुजरात टाइटन्ससँग भेट पक्का गरेको छ । शुक्रबार गुजरातलाई हराए मुम्बईले फाइनलमा चेन्नईसँगको भेट पक्का गर्नेछ । जितको लागि १ सय ८३ रनको विजयी लक्ष्य पछ्याएको लखनऊ १६.३ ओभरमा १ सय १ रनमा अल आउट भयो ।

लखनऊका मार्कस स्टोइनिसले २७ बलमा ५ चौका र १ छक्कासहित सर्वाधिक ४० रनको योगदान दिए । कायल मेयर्स १८ र दीपक हुडा १५ रनमा आउट भए । अन्य कुनैपनि लखनऊका ब्याटरले दोहोरो अंकमा रन बनाउन सकेनन् । निकोलस पुरन डक आउट भए ।

मुम्बईका आकाश माधवालले ३.३ ओभरमा ५ रन खर्चेर ५ विकेट लिए । क्रिस जोर्डन र पियुष चवालाले समान एक विकेट लिए ।

त्यसअघि चेन्नईमा टस जितेर पहिला ब्याटिङको निम्तो पाएको मुम्बईले निर्धारित २० ओभरमा ८ विकेट गुमाउँदै १ सय ८२ रन बनाएको थियो । मुम्बईको जितमा क्यामरन ग्रीनले २३ बलमा ६ चौका र १ छक्कासहित सर्वाधिक ४१ रनको योगदान दिए ।

ओपनर तथा कप्तान रोहित शर्मा १० बलमा १ चौका र १ छक्कासहित ११ रनमा आउट भएका थिए । रोहित तीव्र गतिका बलर नविन उल हकको बलमा कभरमा आयुष बदोनीबाट क्याच आउट भएका थिए । युवा तीव्र गतिका बलर यश ठाकुरको पाँचौं ओभरको दोस्रो बलमा एज लागेर ईशान किशन विकेटकिपर निकोलस पुरनबाट १५ रनमा क्याच आउट भए । किशनले १२ बलमा ३ चौका प्रहार गरे ।

तेस्रो विकेटका लागि सूर्यकुमार यादव र क्यामरन ग्रीनले ३८ बलमा ६६ रनको साझेदारी गर्दै राम्रो योगफलको सम्भावना देखाएका थिए । तर नविनले ११ औं ओभरमा सूर्य र ग्रीन दुबैलाई आउट गरेपछि लखनऊ खेलमा फर्किएको थियो ।

चौथो बलमा सूर्य कृष्णाप्पा गौतमबाट क्याच आउट भए । लेगकटर बलमा सूर्य मिडअफमा क्याच आउट हुन पुगेका थिए । सूर्यले २० बलमा २ चौका र २ छक्का प्रहार गरे । एक बलपछि ग्रीन बोल्ड भएपछि मुम्बई दबाबमा परेको थियो । दुबै स्वलोअर बलमा आउट भएका थिए ।

नेहाल वढेरा १२ बलमा २ चौका र २ छक्कासहित २३, तिलक बर्मा २६, टिम डेविड १३ र क्रिस जोर्डन ४ रनमा आउट भए । लखनऊका नविन उल हकले ४ ओभरमा ३८ रन खर्चेर ४ विकेट लिए । यश ठाकुरले ४ ओभरमा ३४ रन खर्चेर ३ विकेट लिए । मोहसिन खानको नाममा एक विकेट रह्यो ।

पहिलो क्वालिफायर खेलमा चेन्नई सुपर किंग्सले गुजरात टाइटन्सलाई १५ रनले हराउँदै फाइनलमा स्थान बनाएको छ । शुक्रबार गुजरात र मुम्बईबीच प्रतिस्पर्धा हुनेछ । जसको विजेता टोलीले आइतबार फाइनलमा चेन्नईसँग खेल्नेछ ।