काठमाडौं (हाम्रो खेलकुद) – नेपालले आगमी महिना जिम्बावेमा हुने आइसिसी एकदिवसीय विश्वकप छनोटको लागि नेपालको २२ सदस्य प्रारम्भिक टोली घोषणा गरेको छ । घोषणा टोलीमा नेपालले खासै परिवर्तन गरेको छैन । पछिल्लो समय बन्द प्रशिक्षणमा बोलाउँदै आएका खेलाडीलाई बोलाएको छ ।

नेपालले एक हप्ताको बन्द प्रशिक्षणपछि अन्तिम तयारीको लागि दक्षिण अफ्रिका जानेछ । नेपालले एक हप्ताको तयारीपछि अन्तिम टोली घोषणा गर्नेछ । १० टोली सहभागी विश्वकप छनोट आगमी जुन १८ देखि जुलाई ९ सम्म जिम्बावेमा हुनेछ । नेपाल मे अन्तिममा जिम्बावे जानेछ । विश्वकप छनोटमा नेपाल, स्कटल्यान्ड, ओमान, युएई, अमेरिका, श्रीलंका, वेस्टइन्डिज, जिम्बावे, आयरल्यान्ड र नेदरल्यान्ड्स छन् ।

यी १० टोलीलाई आइसिसीले दुई समूह विभाजन गर्नेछ। हालसम्म आइसिसीले समूह विभाजन गरेको छैन । श्रीलंका र वेस्टन्डिज फरक समूहमा हुने पक्कापक्की छ। चाँडैनै समूह विभाजन गर्नेछ। हरेक समूहमा पाँच टोली हुनेछन् ।

हरेक समूहबाट शीर्ष तीन टोली सुपर सिक्समा स्थान बनाउनेछन् । सुपर सिक्समा हरेक टोलीले एक अर्कासँग खेल्नेछन् । जसबाट शीर्ष दुई टोली फाइनलमा पुग्नेछन् । फाइनलमा पुग्ने दुई टोलीले नै भारतमा हुने एकदिवसीय विश्वकप खेल्न पाउनेछन् ।

नेपालले दक्षिण अफ्रिकामा नेदरल्यान्ड्स र स्कटल्यान्डसँग अभ्यास खेल खेल्नेछ । यो खेल वार्मअप म्याच हुनेछ । अर्थात ओडिआई मान्यता खेल हुनेछैन । नेपालले दक्षिण अप्रिका ए टोलीसँग पनि खेल खेल्ने सम्भावना छ ।

नेपालको २२ सदस्य टोली :

कुशल भुर्तेल, आशिफ शेख, ज्ञानेन्द्र मल्ल, रोहित पौडेल(कप्तान), कुशल मल्ल, आरिफ शेख, दीपेन्द्र सिंह ऐरि, गुलसन झा, सोमपाल कामी, करण केसी, सन्दीप लामिछाने, भीम सार्की, प्रतिश जि.सी, ललित राजवंशी, अर्जुन साउद, सन्दीप जोरा, देव खनाल, किशोर महतो, सुर्य तामाङ, कमल सिंह ऐरी, श्याम ढकाल र अविनास बोहोरा