हिमाल खरेल/बिर्तामोड

बिर्तामोड नगरपालिका नगर खेलकुद विकास समितिले आयोजना गर्ने प्रथम कर्पोरेट सुपर सिक्स क्रकेट प्रतियोगितामा पूर्वराष्ट्रिय खेलाडी महबुब आलमले खेल्ने भएका छन् ।

बिहीबार बिर्तामोडमा आयोजित पत्रकार सम्मेलनमा आलमले बिटिएम मन्त्र थकाली टिमको प्रतिनिधित्व गर्ने टिम कप्तान सुरज खड्काले जानकारी दिएका छन् ।

बिटिएम मन्त्र थकालीमा आलमसहित कप्तान सुरज खड्का, नृत्य खडोलिया, अभ्यास तिम्सिना, रुपनारायण श्रेष्ठ, फिर्दोस अन्सारी, दिपक काफ्ले र उमेश खरेल मैदान उत्रिने छन् । फिर्दोस अन्सारी कोशी प्रदेशका प्रमुख अलराउन्डर हुन् । उनले तीव्र गतिसँगै तल्लोक्रममा राम्रो प्रदर्शन गर्ने गर्दछन् ।

यसैबीच, बिटिएम मन्त्र थकालीले आलमको जर्सी पनि सार्वजनिक गरेको छ । प्रतियोगिता झापाको बिर्तामोडमा जेठ ६ गतेदेखि सुरु हुनेछ । प्रतियोगिता बिर्तामोड नगरपालिका नगर खेलकुद विकास समितिको आयोजनामा बिर्तामोडको डोमालाल राजवंशी रंगशालामा प्रतियोगिता हुनेछ । प्रतियोगितामा २० टोलीको सहभागीता रहनेछ ।

प्रतियोगिता विजेता टोलीले नगद एक लाख रुपैयाँ, ट्रफी, मेडल र प्रमाणपत्र प्राप्त गर्नेछन् । उपविजेता टिमले नगद पचास हजार रुपैयाँ, ट्रफी, मेडल र प्रमाणपत्र पाउने छन् । प्रतियोगिता सर्वोत्कृष्ट खेलाडीले १० हजार, उत्कृष्ट ब्याटर र बलरले समान ५ हजार १ सय रुपैयाँ पाउनेछन् । खेलको प्रत्येक म्यान अफ द म्याचले २१ सय रुपैयाँ पाउनेछन् । फाइनल खेल भने रात्रिकालिन हुनेछ ।