काठमाडौं (हाम्रो खेलकुद) – नेपालले आगमी महिना जिम्बावेमा हुने आइसिसी विश्वकप छनोटको अन्तिम तयारी दक्षिण अफ्रिकामा गर्ने भएको छ । नेपाल क्रिकेट संघ (क्यान) का कार्यवाहक सचिव दुर्गाराज पाठकले नेपाल दुई सातापछि अन्तिम तयारीको लागि दक्षिण अफ्रिका जाने बताएका छन् ।

१० टोली सहभागी विश्वकप छनोट आगमी जुन १८ देखि जुलाई ९ सम्म जिम्बावेमा हुनेछ । नेपाल मे अन्तिममा जिम्बावे जानेछ । त्यसको लागि भिसाको काम भई राखेको पाठकले जानकारी दिए । ‘नेपालले अन्तिम तयारी दक्षिण अफ्रिकामा गर्नेछ । त्यहाँ नेपाल मे अन्तिम तिर जान्छ होला’, पाठकले भने ।

नेपालले दक्षिण अफ्रिकामा बलियो टोलीसँग अभ्यासको लागि माग गरेको उनले बताए । ‘हामीले स्कटल्यान्ड र नेदरल्यान्ड्ससँग वार्मअप म्याच खेल्ने पक्का भएको छ । मिलेसम्म दक्षिण अफ्रिका एउटा बलियो घरेलु टोलीसँग अभ्यास खेल्न कुरा गरेका छौं । दक्षिण अफ्रिका ए वा कुनै टोलीसँग अभ्यास गर्ने तयारी पनि छ’, पाठकले भने ।

नेपाल जुन दोस्रो साता जिम्बावे जाने पाठकले जानकारी दिएका छन् । नेपाल, स्कटल्यान्ड र नेदरल्यान्ड्सले दक्षिण अफ्रिकामा अन्तिम तयारी गर्ने पक्का भएको छ । स्कटल्यान्डले विश्वकप छनोट खेल्ने १५ सदस्य टोली घोषणा गरेको छ । जुन २ मा स्कटल्यान्ड दक्षिण अफ्रिका पुग्नेछ । स्कटल्यान्डले आधिकारीक रुपमा नेपाल र नेदरल्यान्ड्ससँग वार्मअप खेल खेल्ने जनाएको छ।

विश्वकप छनोटमा नेपाल, स्कटल्यान्ड, ओमान, युएई, अमेरिका, श्रीलंका, वेस्टइन्डिज, जिम्बावे, आयरल्यान्ड र नेदरल्यान्ड्स छन् । यी १० टोलीलाई आइसिसीले दुई समूह विभाजन गर्नेछ। हालसम्म आइसिसीले समूह विभाजन गरेको छैन । श्रीलंका र वेस्टन्डिज फरक समूहमा हुने पक्कापक्की छ। चाँडैनै समूह विभाजन गर्नेछ। हरेक समूहमा पाँच टोली हुनेछन् ।

हरेक समूहबाट शीर्ष तीन टोली सुपर सिक्समा स्थान बनाउनेछन् । सुपर सिक्समा हरेक टोलीले एक अर्कासँग खेल्नेछन् । जसबाट शीर्ष दुई टोली फाइनलमा पुग्नेछन् । फाइनलमा पुग्ने दुई टोलीले नै भारतमा हुने एकदिवसीय विश्वकप खेल्न पाउनेछन् ।

नेपालले बन्द प्रशिक्षणको लागि एक दुई दिन भित्रमा टोली घोषणा गर्ने पाठकले जानकारी दिए । वेस्टइन्डिज र स्कटल्यान्डले भने विश्वकप छनोट खेल्ने अन्तिम टोली घोषणा गरि सकेका छन् ।

वेस्टइन्डिजको टोली :

शाई होप (कप्तान), रोभम्यान पावेल, शम्राह ब्रुक्स, यानिक कारिया, केसी कार्टी, रोस्टन चेश, जेसन होल्डर, अकिल हुसैन, अल्जारी जोशेफ, ब्रेन्डन किंग, कायल मेयर्स, कौडाकेश मोती, किमो पल, निकोलस पुरन र रोमारियो शेफर्ड।

स्कटल्यान्डको टोली :

रिची बेंरिंगटन (कप्तान), म्याथ्यु क्रस, अलास्डेयर इभान्स, क्रिस ग्रेभ्स, ज्याक जार्विस, माइकल लिस्क, टोम्स मार्किनटस, क्रिस म्याकब्राइड, ब्रेन्डन म्याकमुलन, जर्ज मुन्शे, एड्रियन नील, शफ्यान शरिफ, क्रिस सोल, हम्जा ताहिर र मार्क वाट ।