एजेन्सी – युवा ओपनर यशस्वी जैशवालको आक्रामक ब्याटिङमा राजस्थान रोयल्सले इन्डियन प्रिमियर लिग अन्तर्गत विहीबार कोलकाता नाइट राइडर्सलाई पराजित गरेको छ ।

कोलकाताले प्रस्तुत गरेको १ सय ५० रनको लक्ष्य राजस्थानले १४ औं ओभरमा नै पूरा गरेको थियो । जैशवाल शतकबाट २ रनले चुकेपनि उनले आक्रामक ब्याटिङ गर्दै राजस्थानलाई सहज जित दिलाए । विजयी चौका प्रहार गरेका जैशवालले ४७ बलको सामना गर्दै १२ चौका र ५ छक्का प्रहार गरे । उनी ९८ रनमा नटआउट रहे ।

जैशवालले इनिङको पहिलो ओभरमा नै ३ चौका र २ छक्कासहित २६ रन जोड्दै अभूतपूर्व सुरुवात दिलाएका थिए । १३ बलमै अर्धशतक पूरा गरेका जैशवालको ब्याटिङमा राजस्थानले ६ ओभरमा नै ७८ रन जोडेको थियो । जश बटलर दोस्रो ओभरमा रनआउट भएपनि कप्तान सन्जु स्यामसनले दोस्रो विकेटका लागि नटआउट १ सय २१ रनको साझेदारी गरे ।

स्यामसनले २९ बलमा ४८ रनको योगदान दिए । उनले २ चौका र ५ छक्का प्रहार गरेका थिए । यस जितले राजस्थान १२ खेलमा १२ अंकका साथ तेस्रो स्थानमा उक्लिएको छ । सातौं स्थानमा रहेको कोलकाताको १२ खेलमा १२ अंक छ ।

त्यसअघि टस हारेपछि ब्याटिङको निम्तो पाएको कोलकाताले २० ओभरमा ८ विकेट गुमाउँदै १ सय ४९ रन बनाएको थियो । वेंकटेश ऐरले सर्वाधिक ५७ रन जोड्नुबाहेक अन्य ब्याटरले उल्लेख्य योगदान दिन सकेनन् । राजस्थानका स्पिनर युजवेन्द्र चहलले ४ ओभरमा २५ रन खर्चेर ४ विकेट लिँदै उच्च प्रदर्शन गरे । ट्रेन्ट बोल्टले ३ ओभरमा १५ रन दिँदै २ विकेट लिएका थिए ।