एजेन्सी – न्युजिल्यान्डले अन्तिम तथा पाँचौं ओडिआई खेलमा घरेलु टोली पाकिस्तानलाई ४७ रनले हराएको छ । सिरिज भने न्युजिल्यान्डले १-४ ले गुमाएको छ । अन्तिम खेलमा जितका साथ न्युजिल्यान्ड क्लिनस्वीप हार हुनबाट बचेकोछ ।

जितको लागि ३ सय रनको विजयी लक्ष्य पछ्याएको पाकिस्तान ४६.१ ओभरमा २ सय ५२ रनमा अल आउट भयो । पाकिस्तानका इफ्तिखर अहमद ७२ बलमा ८ चौका र २ छक्कासहित सर्वाधिक ९४ रनमा अविजित रहे । अघा सलमान ५७ बलमा ६ चौका र १ छक्कासहित ५७ रनमा आउट भए । एक समय ६६-४ को अवास्थामा पुगेको पाकिस्तानलाई पाँचौं विकेटका लागि अघा सलमान र इफ्तिखर अहमदले ९७ रनको साझेदारी गर्दै जितको आशा कायम राखेका थिए ।

उस्मा मिर २०, शादब खान १४, ओपनर फखार जमान ३३, शन मसुद ७, बाबर आजम १ र मोहम्मद रिजवान ९ रनमा आउट भए । न्युजिल्यान्डका हेनरी शिफ्लेले ९ ओभरमा १ मेडनसहित ३४ रन खर्चेर ३ विकेट लिए । रचिन रविन्द्रले १० ओभरमा ६५ रन खर्चेर ३ विकेट लिए । एडम मिल्ने, म्याट हेनरी र ईश सोधीले समान एक विकेट लिए ।

त्यसअघि नेशनल स्टेडियम कराँचीमा टस जितेर पहिला ब्याटिङ रोजेको न्युजिल्यान्ड ४९.३ ओभरमा २ सय ९९ रनमा अल आउट भयो । न्युजिल्यान्डका विल योंग ९१ बलमा ८ चौका र २ छक्कासहित सर्वाधिक ८७ रनमा आउट भए । कप्तान टम लाथम ५८ बलमा ५ चौकासहित ५९, हेनरी निकोलस २३, मार्क च्यापम्यान ४३ र रचिन रविन्द्र २८ र एडम मिल्ने ४ रनमा आउट भए ।

पाकिस्तानका शाहिन अफ्रिदीले १० ओभरमा ४६ रन खर्चेर ३ विकेट लिए । उस्मा मिर र शादब खानले समान दुई विकेट लिए । फखार जमान प्लेयर अफ द सिरिज चुनिए । हेनरी शिफ्ले खेलको प्लेयर अफ द म्याच चुनिए ।