एजेन्सी – ओपनर जस बटलर र कप्तान सञ्जु स्यामसनको सानदार ब्याटिङमा राजस्थान रोयल्सले इन्डियन प्रिमियर लिग (आइपिएल) २०२३ को ५२ औं खेलमा सनराइजर्स हैदराबादलाई २ सय १५ रनको विशाल लक्ष्य दिएको छ । जयपुरमा टस जितेर पहिला ब्याटिङ रोजेको राजस्थानले निर्धारित २० ओभरमा २ विकेट गुमाउँदै २ सय १४ रन बनायो ।

राजस्थानका ओपनर जस बटलरले ५९ बलमा १० चौका र ४ छक्कासहित सर्वाधिक ९५ रनको योगदान दिए । तीव्र गतिका बलर भुवनेश्वर कुमारले १९ औं ओभरको तेस्रो बलमा एलबीडब्लू आउट गरेपछि बटलर आइपिएल करिअरको छैटौं शतक बनाउन पाँच रनले चुकेका थिए । भुवनेश्वरले रिभ्युका साथ पेभेलिएन फर्काएका थिए ।

दोस्रो विकेटका लागि कप्तान सञ्जु स्यामसन र जस बटलरले १ सय ३८ रनको सानदार शतकीय साझेदारी गरेका थिए । राजस्थानका युवा ओपनर यशस्वी जैसवालले १८ बलमा ५ चौका र २ छक्कासहित ३५ रन जोड्दै आउट भए ।

सन्जु स्यामसन ३८ बलमा ४ चौका र ५ छक्कासहित ६६ रनमा अविजित रहे । शिम्रन हेटमायर ५ बलमा ७ रनमा अविजित रहे । हैदराबादका भुवनेश्वर कुमार र मार्को यानसनले समान एक विकेट लिए ।