एजेन्सी – युवा ब्याटर यशस्वी जैसवालको सानदार शतकमा राजस्थान रोयल्सले इन्डियन प्रिमियर लिग (आइपिएल) २०२३ को ४२ औं खेलमा मुम्बई इन्डियन्सलाई २ सय १३ रनको विशाल लक्ष्य दिएको छ ।

वानखडेमा टस जितेर पहिला ब्याटिङको निम्तो पाएको राजस्थानले निर्धारित २० ओभरमा ७ विकेट गुमाउँदै २ सय १२ रन बनायो । राजस्थानका ओपनर यशस्वी जैसवालले ६२ बलमा १६ चौका र ८ छक्कासहित १ सय २४ रनको सानदार शतकीय इनिङ खेले । उनले ५३ बलमा आफ्नो आइपिएल करिअरको पहिलो शतक हानेका थिए ।

एकतर्फबाट निरन्तर विकेट गुमेपनि अर्कोतर्फबाट जैसवालले सानदार प्रदर्शन गर्दै राजस्थानलाई विशाल योगफलमा पुर्याएका हुन् । पहिलो विकेटका लागि जस बटलर र जैसवालले ७.१ ओभरमा ७२ रनको साझेदारी गर्दै राम्रो सुरुवात दिलाएका थिए । बटलर १९ बलमा २ चौका र १ छक्कासहित १८ रनमा आउट भए ।

जैसवाल बाहेक अन्य कुनैपनि राजस्थानका ब्याटरले राम्रो प्रदर्शन गर्न सकेनन् । राजस्थानका सञ्जु स्यामसन १४, देवदत्त पाडिक्कल २, जेसन होल्डर ११, शिम्रन हेटमायर ८ र ध्रुव जुरेल २ रनमा आउट भए ।

मुम्बईका पियुष चवालाले ४ ओभरमा ३४ रन खर्चेर २ विकेट लिए । जोफ्रा आर्चरले ४ ओभरमा ३५ रन खर्चेर १ विकेट लिए । राइली मेरीडिथले ४ ओभरमा ५१ रन खर्चेर १ विकेट लिए । अर्शद खानले ३ ओभरमा ३९ रन खर्चेर ३ विकेट लिए ।