राकेश तिमल्सिना
चितवन – चौथो क्याची एसएसपी कप क्रिकेट प्रतियोगितामा बिहीबार बुटवलको वेस्टर्न क्रिकेट एकेडेमी र काठमाडौँको क्यापिटल कलेज विजयी भएका छन् ।

विशाल चोकको नौ बिगाहा मैदानमा भएको पहिलो खेलको छिनोफानो सुपर ओभरबाट भएको थियो । ९१ रनको विजय लक्ष्य पछ्याएको बुटवलले निर्धारित ओभरमा ९० रन मात्र बनाउन सक्यो ।
बुटवलका लागि बिक्रम भुषालले २१ र भुवन पाण्डेयले १९ रन बनाए । सुपर ओभरमा २० रनको लक्ष्य पछ्याएको हेटौँडा सिटीले ५ रन बनाएपछि १४ रनले पराजित भयो । त्यसअघि टस हारेर ब्याटिङको निम्तो पाएको हेटौँडा सिटीले निर्धारित १६ ओभरको खेलमा १५.२ ओभरमा ९० रन बनाएको थियो । हेटौँडाका लागि रवि थापाले सर्वाधिक २० रन बनाए । बलिङतर्फ शाहा आलमले ४ विकेट लिए । अलराउन्ड प्रदर्शन गरेका शाहा आलम खेलको म्यान अफ द म्याच घोषित भए ।
त्यस्तै, अर्को खेलमा काठमाडौँको क्यापिटल कलेजले धनगढीको सुदूर पश्चिम एकेडेमीलाई ७८ रनले हरायो । समूहको दुबै खेल हारेको धनगढी प्रतियोगिताबाट बाहिरिएको छ । टस हारेर ब्याटिङको निम्तो पाएको क्यापिटलले विष्फोटक ब्याटिङ गर्दै निर्धारित १८ ओभरमा २ सय ४ रनको विशाल योगफल तयार पारेको थियो । क्यापिटलको जितमा दीलिपनाथले सर्वाधिक ८० रन बनाए । ४९ बल खेलका उनले ७ चौका र ४ छक्का प्रहार गरे । त्यस्तै, प्रनित थापाले ५६ र कुशल भुर्तेलले २५ रन जोडे । बलिङतर्फ धनगढीका महेश अधिकारीले २ विकेट लिए ।
२ सय ४ रनको विशाल लक्ष्य पछ्याएको धनगढीले १८ ओभरमा ८ विकेट गुमाएर १ सय २५ रनमात्र बनाउन सक्यो । धनगढीका रोशन अधिकारीले २७ र विपिन रावलले २४ रन बनाए । बलिङतर्फ क्यापिटलका अमरसिंह रटौलाले ४ विकेट लिए । अर्धशतकीय पारी खेलेका क्यापिटलका दीलिपनाथ म्यान अफ द म्याच घोषित भए ।

क्याची एसएसपी कपमा शुक्रबारको
न्यु होराइजन क्रिकेट एकेडेमी, भैरहवाविरुद्ध ग्रेस वीरेन्द्र भरतपुर
काठमाडौँको क्यापिटल कलेजविरुद्ध भरतपुरको नेपाल पोलिटेक्निक कलेज