एजेन्सी – मार्कस स्टोइनिस, निकोलस पुरन र कायल मेयर्सको सानदार ब्याटिङमा लखनऊ सुपर जायन्ट्सले इन्डियन प्रिमियर लिग (आइपिएल) २०२३ को ३८ औं खेलमा पन्जाब किंग्सलाई २ सय ५८ रनको कीर्तिमानी विशाल लक्ष्य दिएको छ ।

मोहालीमा टस हारेर पहिला ब्याटिङको निम्तो पाएको लखनऊले निर्धारित २० ओभरमा ५ विकेट गुमाउँदै २ सय ५७ रन बनायो । यो आइपिएल इतिहासकै दोस्रो ठूलो योगफल हो । आइपिएलमा सर्वाधिक ठूलो योगफल २०१३ मा रोयल च्यालेन्जर्स बेंगलोरले पुणे वारियर्सविरुद्ध ५ विकेट गुमाउँदै २ सय ६३ रन बनाएको थियो । अन्य कुनैपनि टोलीले आइपिएलमा २ सय ५० रनको योगफल कटाएका छैनन् ।

लखनऊका मार्कस स्टोइनिसले ४० बलमा ६ चौका र ५ छक्कासहित सर्वाधिक ७२ रनको योगदान दिए । कप्तान लोकेश राहुल ९ बलमा १ चौका र १ छक्कासहित १२ रनमै आउट भए । तर अर्का ओपनर कायल मेयर्सले २४ बलमा ७ चौका र ४ छक्कासहित ५४ रन जोड्दै उत्कृष्ट सुरुवात दिलाएका थिए ।

आयुष बदोनीले २४ बलमा ३ चौका र ३ छक्कासहित ४३ रन बनाउदै आउट भए । तेसो विकेटका लागि स्टोइनिस र बदोनीले ८९ रनको सानदार साझेदारी गरेका थिए । निकोलस पुरन १९ बलमा ७ चौका र १ छक्कासहित ४५ रनमा आउट भए । चौथो विकेटका लागि निकोलस पुरन र मार्कस स्टोइनिसले ३० बलमा ७६ रनको साझेदारी गरेका थिए । दीपक हुडा ११ र क्रुनाल पान्ड्याले ५ रन बनाए ।

पन्जाबका कागिसो रबाडाले ४ ओभरमा ५२ रन खर्चेर २ विकेट लिए । अर्शदीप सिंह, साम करन र लियाम लिभिङस्टोनले समान एक विकेट लिए ।