काठमाडौं (हाम्रो खेलकुद) – नेपालले एसिसी प्रिमियर कपको पहिलो सेमिफाइनल खेलमा शनिबार कुवेतसँग खेल्दैछ । खेल बिहान ९ बजे टियु क्रिकेट मैदानमा सुरु हुनेछ । नेपाल समूह ए को विजेता र कुवेत समूह बी को उपविजेताको रुपमा सेमिफाइनलमा स्थान बनाएका हुन् ।

नेपाल कुवेतलाई हराउँदै फाइनलमा स्थान बनाउने सोचका साथ मैदान प्रवेश गर्नेछ । कुवेतदेखी नेपाल भने सजग छ । कुवेतले समूह चरणको अन्तिम खेलमा हङकङलाई ३० रनले हराउँदै सेमिफाइनलमा स्थान बनाएको थियो । उक्त खेलमा कुवेतले मुलपानी मैदानमा २ सय ७२ रन बनाएको थियो ।

कुवेतले यस प्रतियोगितामा युएईसँग मात्रै हारेको छ । पहिलो खेलमा कुवेत युएईसँग १ सय ४३ रनले पराजित भएको थियो । कुवेतले जितको लागि ३ सय ७२ रनको विशाल लक्ष्य पछ्याउनेक्रममा ३६.३ ओभरमा २ सय २८ रनमा अल आउट भएको थियो । कुवेतका परविन्दर सिंहले २६ बलमा १ चौका र ७ छक्कासहित ५३ रनमा आउट भएका थिए ।

सैयद मोनिबले ३६ बलमा ५ चौका र ६ छक्कासहित ६८ रनको एक सानदार इनिङ खेलेका थिए । कुवेतले मुलपानीमै बहराइनविरुद्ध २ सय ५६ रनको लक्ष्य पछ्याएको थियो । कुवेतले टि२० शैलीमा सानदार प्रदर्शन गर्दै आएको छ ।

तुलनात्मक रुपमा बलिङ र फिल्डिङ कमजोर रहेपनि ब्याटिङमा भने सानदार प्रदर्शन गर्दै आएको छ । ब्याटिङ नै कुवेतको प्रमुख हतियार हो ।

ओपनर आदनान इद्रिसले यस प्रतियोगितामा ३ खेलमा १ सय ३९ रन बनाएका छन् । सैयद मोनिब यस प्रतियोगितामा सर्वाधिक स्ट्राइक रेटमा ब्याटिङ गर्ने ब्याटर समेत हुन् । युवा ब्याटर मित भावसार कुवेतका ठूला आसालाग्ला ब्याटर हुन् ।

अघिल्लो वर्ष नेपाली यू-१९ टोलीलाई हराउन उनले एक्लै १ सय ७५ रनको अविजित इनिङ खेलेका थिए । यस प्रतियोगितामा अपेक्षा अनुसार चल्न नसेका उनी नेपाललाई निराश बनाउन सक्ने खेलाडी हुन् ।

आदनान इद्रिस, रविजा सानदरवान, परविन्दर कुमार, मोहम्मद अस्लाम, मित भावसर, शिराज खान, उस्मान पटेल र सैयद मोनिब कुवेतक ब्याटर हुन् । जसमा मोनिब, परविन्दर र इद्रिस घातक बन्न सक्छन् ।

युवा स्पिनर यासिन पटेलको यस प्रतियोगितामा प्रदर्शन सानदार छ । यस प्रतियोगिताकै सर्वाधिक उत्कृष्ट २.८२ को इकोनमीमा बलिङ गरेका छन् । यासिन पटेल, मोनिब र शाहरुख क्युदुस कतारका प्रमुख बलर हुन् ।

कुवेत विना दबाब क्रिकेट खेल्ने छ । उसलाई गुमाउनु केहि हुनेछैन । विना दबाब आफ्नो उत्कृष्ट क्रिकेट खेल्न चाहन्छ । नेपाली दर्शक सामू खेल्न भने केहि कठिन हुनसक्छ । उनीहरुले नेपाली दर्शक जस्तो भिडमा खेल्ने अवसर पाएका छैनन् ।

यता नेपाल पछिल्लो खेलमा कतारविरुद्ध १ सय ५७ रनमा अल आउट भएको थियो । उत्कृष्ट बलिङका साथ कतारलाई ८९ रनमा अल आउट गरेको थियो । नेपालका ओपनर आसिफ शेख र कुशल भुर्तेल यस प्रतियोगितामा चल्न सकेका छैनन् । यी दुई ओपनरबाट नेपाल राम्रो सुरुवात चाहन्छ । तेस्रो नम्बरमा भीम सार्की नै खेल्नेछन् ।

भीमले नेपाली टोलीबाट लगातार राम्रो गर्दै आएका छन् । नेपाल उनीबाट उत्कृष्ट प्रदर्शन चाहन्छ । कप्तान रोहित पौडेललाई पनि प्रदर्शनको दबाब छ । कुशल मल्ल राम्रो लयमा छन् ।

साउदीविरुद्ध ७० र ओमानविरुद्ध १ सय ८ रन बनाएका आक्रामक अलराउन्डर कुशलबाट उनको शैलीमै विष्फोटक ब्याटिङ चाहन्छ । नेपालको ब्याटिङमा गहिराई हुँदा कमजोर सुरुवातबाट पनि पूनरागमन गर्न सक्छ ।

तल्लोक्रममा आरिफ शेख र दीपेन्द्रसिंह ऐरीको भूमिका निकै महत्वपूर्ण हुनेछ । नेपालले टोलीमा एक परिवर्तन गर्ने सम्भावना छ । गुलशन झाको स्थानमा करण केसीलाई मैदान उतार्ने छ । करण र सोमपालले तल्लोक्रममा राम्रो ब्याटिङ गर्ने गर्दछन् । कतारविरुद्ध ४२ रन बनाएका सन्दीपबाट पनि राम्रो आशा गर्न सकिन्छ ।

स्पिनरमा सन्दीप र ललित पहिलो रोजाईमा खेल्दै आएका छन् । ललितले नयाँ बलका साथ विकेट लिँदै आएका छन् । नेपाल पावर प्लेमा सोमपाल र करणबाट उत्कृष्ट सुरुवात चाहन्छ । मध्यक्रममा भने सन्दीप लामिछानेको प्रदर्शन महत्वपूर्ण हुनेछ।

सन्दीप नेपालका प्रमुख स्पिनर हुन् । उनको प्रदर्शनले धेरै फरक पार्नेछ । बायाँ हाते (देब्रे) बलरविरुद्ध नेपाली ब्याटरको इतिहास राम्रो छैन । कुवेतमा मोहम्मद अस्लाम र यासिन पटेल दुबै बायाँ हाते स्पिनर हुन् । यी दुई स्पिनरविरुद्ध नेपाल सजग हुनुपर्छ ।

हेड ट हेड :

नेपालले कुवेतसँग ५० ओभरको खेलमा पछिल्लो पटक २०१२ मा खेलेको थियो । एसिसी इलिट ट्रफीमा नेपाल कुवेतसँग ४ विकेटले पराजित भएको थियो । पारस खड्का १ सय ६ र ज्ञानेन्द्र मल्लले ५३ रन बनाएपछि कुवेतलाई २ सय ८१ रनको लक्ष्य दिएको थियो । उक्त लक्ष्य कुवेतले ४६.२ ओभरमै पुरा गरेको थियो ।

नेपालले पछिल्लो पटक कुवेतसँग टि२० विश्वकप छनोट २०१९ मा खेलेको थियो । उक्त खेलमा नेपाल ७ विकेटले विजयी भएको थियो । शनिबार नै मुलपानी मैदानमा दोस्रो सेमिफाइनलमा ओमान र युएईबीच प्रतिस्पर्धा हुनेछ । उक्त खेलसँगै मुलपानी मैदानले ओडिआई मान्यता पाउनेछ ।

फाइनल सोमबार हुनेछ । यस प्रतियोगिता विजेता टोलीले आगमी सेप्टेम्बरमा पाकिस्तानमा हुने एसिया कप खेल्न पाउनेछ । एसिया कपमा भारत र पाकिस्तानसँग खेल्न पाउनेछ।

कुवेतको टोली :

मोहम्मद अस्लाम (कप्तान), आदनान इद्रिस, सैयद मोनिब, उस्मान पटेल, बिलाल ताहिर, मोहम्मद अमिन, रजिवा संदरुवान, मित भावसार, शिराज खान, परविन्दर कुमार, यसिन इशक पटेल, क्लिन्टो एन्टो, शाहरुख कुद्दुस र इलियास अहमद ।

नेपालको टोली :

रोहित पौडेल (कप्तान), कुशल भुर्तेल, आसिफ शेख, ज्ञानेन्द्र मल्ल, कुशल मल्ल, आरिफ शेख, सोमपाल कामी, दीपेन्द्रसिंह ऐरी, गुलशन झा, करण केसी, सन्दीप लामिछाने, भीम सार्की, प्रतिश जि.सी र ललित राजवंशी ।