काठमाडौं (हाम्रो खेलकुद) – ओपनर अब्दुल वहिद र तेस्रो नम्बरका ब्याटर साद खानको अर्धशतकमा साउदी अरेवियाले एसिसी प्रिमियर कपमा ओमानलाई दबाबमा राखेको छ । जितको लागि ३ सय ६७ रनको विशाल लक्ष्य पछ्याएको साउदीले २१ ओभरमा १ विकेट गुमाउँदै १ सय ३७ रन बनाएको छ ।

ओपनर अब्दुल वहिद ५५ बलमा ११ चौका र १ छक्कासहित ६८ रनमा क्रिजमा छन् । उनलाई साद खानले ६० बलमा ९ चौकासहित ५८ रनमा साथ दिएका छन् ।

दोस्रो विकेटका लागि अब्दुल र साद खानले १ सय ३० रनको सानदार शतकीय साझेदारी गर्दै जितको सम्भावना कायमै राखेका छन् । ओपनर वाकर उल हसन भने ३ रनमा बिलाल खानको बलमा आउट भए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको ओमानले निर्धारित ५० ओभरमा ६ विकेट गुमाउँदै ३ सय ६६ रन बनाएको थियो ।

ओमानका जतिन्दर सिंह ८८, कश्याप प्रजापति ५१, शोएब खान ६८, मोहम्मद नदिम ७१ र जिशान मकसुद ५४ रन बनाएका थिए । यस खेलको विजेता टोली सेमिफाइनलमा पुग्नेछ । समूह ए बाट नेपाल भने एक खेल अगावै सेमिफाइनलमा पुगि सकेको छ ।