एजेन्सी – फाफ डु प्लेसिसको उत्कृष्ट ब्याटिङमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२३ को २७ औं खेलमा पन्जाब किंग्सलाई १ सय ७५ रनको प्रतिसपर्धात्मक लक्ष्य दिएको छ ।

मोहालीमा टस हारेर पहिला ब्याटिङको निम्तो पाएको बेंगलोरले निर्धारित २० ओभरमा ४ विकेट गुमाउँदै १ सय ७४ रन बनायो । बेंगलोरका फाफ डु प्लेसिसले ५६ बलमा ५ चौका र ५ छक्कासहित सर्वाधिक ८४ रनको योगदान दिए । कप्तान विराट कोहली ४७ बलमा ५ चौका र १ छक्कासहित ५९ रनमा आउट भए ।

पहिलो विकेटका लागि कोहली र डु प्लेसिसले १६.१ ओभरमा १ सय ३७ रनको साझेदारी गरेका थिए । तर विराट कोहली आउटपछि लगातार विकेट गुमाएपछि विशाल योगफल बनाउनबाट चुकेको थियो । ग्लेन म्याक्सेल डक, दीनेश कार्तिक र महिपाल लोमरोरले समान ७ रन बनाए । शहबाज अहमद ५ रनमा अविजित रहे ।

पन्जाबका हरप्रीत ब्रारले ३ ओभरमा ३१ रन खर्चेर २ विकेट लिए । अर्शदीप सिंह र नाथन एलिसले समान एक विकेट लिए । फाफ डु प्लेसिस फिल्डिङ भने गर्नेछैनन् । उनी पूर्ण रुपमा फिट नहुँदा इम्प्याक्ट प्लेयरको रुपमा खेल्नेछन् । फिल्डिङमा डु प्लेसिसको स्थानमा तीव्र गतिका बलर विजयकुमार वैश्यकको स्थान लिनेछन् । त्यसैको कारण आजको खेलमा विराट कोहलीले कप्तानी गरेका छन् ।