एजेन्सी – कुवेतका परविन्दर कुमारले एसिसी प्रिमियर कपमा युएईविरुद्ध विष्फोटक अर्धशतक प्रहार गर्दै आउट भएका छन् । जितको लागि ३ सय ७२ रनको विशाल विजयी लक्ष्य पछ्याएको कुवेतले १० ओभरमा ५ विकेट गुमाउँदै ९२ रन बनाएको छ ।

परविन्दर कुमार २६ बलमा १ चौका र ७ छक्कासहित ५३ रनमा आउट भए । उनी स्पिनर आयन खान अफ्जलको १० औं ओभरको तेस्रो बलमा बोल्ड आउट भए । उनले २२ बलमा अर्धशतक प्रहार गरेका थिए । युएईका तीव्र गतिका बलर जुनैद सिद्धिकले तीन, सन्चित शर्मा र आयन खान अफ्जलले एक एक विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको युएईले निर्धारित ५० ओभरमा ६ विकेट गुमाउँदै ३ सय ७१ रन बनाएको थियो । युएईका वृत्य अरविन्दले १ सय ४७ बलमा १७ चौका र ९ छक्कासहित १ सय ८५ रनको विष्फोटक शतकीय इनिङ खेले ।

अनुभवी ब्याटर रोहन मुस्तफा १ सय २५ बलमा १० चौका र ४ छक्कासहित १ सय १८ रनमा आउट भए । एक समय २४–३ को दयनीय अवस्थामा पुगेको युएईलाई विशाल योगफलमा पुर्याउन रोहन मुस्तफा र वित्य अरविन्दले २ सय ७५ रनको यादगार दोहोरो शतकीय साझेदारी गरेका थिए ।