एजेन्सी – युवा ब्याटर क्यामरन ग्रीनको अर्धशतकमा मुम्बई इन्डियन्सले इन्डियन प्रिमियर लिग (आइपिएल) २०२३ को २५ औं खेलमा सनराइजर्स हैदराबादलाई १ सय ९३ रनको बलियो लक्ष्य दिएको छ।

हैदराबादको घरेलु मैदान राजिव गान्धी अन्तर्राष्ट्रिय रंगाशालामा टस हारेर पहिला ब्याटिङको निम्तो पाएको मुम्बईले निर्धारित २० ओभरमा ५ विकेट गुमाउँदै १ सय ९२ रन बनायो । मुम्बईका क्यामरन ग्रीन ४० बलमा ६ चौका र २ छक्कासहित ६४ रनमा नटआउट रहे ।

उनको यो आइपिएलको पहिलो अर्धशतक हो । गत डिसेम्बरमा आइपिएल अक्सनमा मुम्बईले ग्रीनमाथि धनको वर्षा गर्नेक्रममा १७ करोड ५० लाख भारु (२८ करोड नेपाली रुपैयाँ) खर्चेर ग्रीनलाई किनेको थियो । सुरुवाती खेलमा भने ग्रीन चल्न सकेका थिएनन् । उनी पन्जाब किंग्सका साम करन १८ करोड ५० लाख भारुपछि आइपिएल अक्सन इतिहासमै सर्वाधिक मूल्य पाउने खेलाडी हुन् ।

टिम डेविड ११ बलमा २ चौकासहित १६ रनमा रन आउट भए । ओपनर तथा कप्तान रोहित शर्मा १८ बलमा ६ चौकासहित २८ रनमा आउट भए । रोहित तीव्र गतिका बलर टि नटराजनको बलमा कप्तान एडेन माक्ररमबाट क्याच आउट भए ।

रोहित आउट हुँदा मुम्बई ४.४ ओभरमा ४१-१ को अवस्थामा थियो । ईशान किशन ३१ बलमा ३ चौका र २ छक्कासहित ३८ रनमा आउट भए । दोस्रो विकेटका लागि ग्रीन र ईशान किशनले ४६ रनको साझेदारी गरेका थिए । सूर्यकुमार यादव ७ रनमै क्याच आउट भए ।

सूर्य र ईशान दुबै तीव्र गतिका बलर मार्को यानसनको बलमा माक्ररमबाट क्याच आउट भएका थिए । चौथो विकेटका लागि ग्रीन र तिलक बर्माले २८ बलमा ५६ रनको साझेदारी गरेका थिए । बर्मा १७ बलमा २ चौका र ४ छक्कासहित ३७ रनको आक्रामक इनिङ खेल्दै आउट भए ।

हैदराबादका मार्को यानसनले ४ ओभरमा ४३ रन खर्चेर २ विकेट लिए । टि नटराजनले ४ ओभरमा ५० रन खर्चेर १ विकेट लिए । भुवनेश्वर कुमारको नाममा १ विकेट रह्यो ।