काठमाडौं (हाम्रो खेलकुद) – मलेसियाले एसिसी प्रिमियर कपको पहिलो खेलमा घरेलु टोली नेपालविरुद्ध मध्यम सुरुवात गरेकोछ । टियु क्रिकेट मैदानमा टस जितेर पहिला ब्याटिङ रोजेको मलेसियाले १० ओभरमा १ विकेट गुमाउँदै ५० रन बनाएको छ ।

मलेसियाका विरनदीप सिंह २९ बलमा ८ रनमा क्रिजमा छन् । कप्तान अहमद फैज १३ बलमा ४ चौकासहित २१ रनमा क्रिजमा छन् । नेपालले तीव्र गतिका बलर सोमपाल कामीलाई चोभार एण्ड र गुलशन झालाई टियु एण्डबाट सुरुवातमा बलिङ गराएको थियो ।

मलेसियालाई ओपनर मोहम्मद आमिर र विरनदीप सिंहले ५.५ ओभरमा २२ रनको साझेदारी गरेका थिए । गुलशन झाको बलमा कभरमा सट खेल्ने धुनमा आमिर १७ रनमा दीपेन्द्रसिंह ऐरीबाट सहज क्याच आउट भएका थिए । उनले १८ बलमा ३ चौका प्रहार गरे ।

नेपालले आजको खेलमा अनुभवी ब्याटर ज्ञानेन्द्र मल्ल, करण केसी र प्रतिश जि.सीलाई बेन्चमा राखेको छ । नेपालले आइसिसी विश्वकप लिग–२ को अन्तिम खेलबाट युएईविरुद्ध मैदान उतारेको प्लेइङ–११ लाई नै निरन्तरता दिएको छ ।

नेपालका सोमपाल कामीले ४ ओभरमा १४ रन खर्चिएका छन् । स्पिनर ललित राजवंशीले १ ओभरमा २ रन खर्चिएका छन् । गुलशन झाले ५ ओभरमा १ मेडनसहित ३३ रन खर्चेर १ विकेट लिए ।

१० टोली सहभागी प्रतियोगिता विजेता टोलीले एसिया कपमा भारत र पाकिस्तानसँग खेल्न पाउँछ । प्रतियोगिता समूह ए मा आयोजक नेपालसँगै ओमान, कतार, मलेसिया र साउदी अरब छन् । समूह बी मा युएई, हङकङ, कुवेत, सिंगापुर र बहराइन छन् ।

नेपालको प्लेइङ ११ :

रोहित पौडेल (कप्तान), कुशल भुर्तेल, आसिफ शेख, कुशल मल्ल, आरिफ शेख, सोमपाल कामी, दीपेन्द्रसिंह ऐरी, गुलशन झा, सन्दीप लामिछाने, भीम सार्की र ललित राजवंशी ।