एजेन्सी – चेन्नई सुपर किंग्सले इन्डियन प्रिमियर लिग (आइपिएल) २०२३ को २४ औं खेलमा रोयल च्यालेन्जर्स बेंगलोरलाई ८ रनले पराजित गरेको छ । यो जितसँगै चेन्नई अंक तालिकामा तेस्रो स्थानमा उक्लिएको छ ।

जितको लागि २ सय २७ रनको विशाल विजयी लक्ष्य पछ्याएको बेंगलोरले निर्धारित २० ओभरमा ८ विकेट गुमाउँदै २ सय १८ रन बनायो । बेंगलोरका ग्लेन म्याक्सवेलले ३६ बलमा ३ चौका र ८ छक्कासहित ७६ रनको विष्फोटक इनिङ खेलेपनि टोलीलाई जिताउन सकेनन् ।

कप्तान फाफ डु प्लेसिस ३३ बलमा ५ चौका र ४ छक्कासहित ६२ रनमा आउट भए । तर तल्लोक्रमका ब्याटर नचलेपछि बेंगलोर पराजित भएको हो । एक समय १५-२ को खराब सुरुवात गरेको बेंगलोरलाई तेस्रो विकेटका लागि म्याक्सवेल र डु प्लेसिसले ६१ बलमा १ सय २६ रनको सानदार शतकीय साझेदारीका साथ खेलमा हाबी बनाएका थिए ।

एक समय बेंगलोर १२ ओभरमा १४१-२ को बलियो अवस्थामा थियो । १३ औं ओभरको पहिलो बलमा म्याक्सवेल आउट भएपछि लगातार विकेट गुमाएको थियो । बेंगलोरका प्रमुख खेलाडी विराट कोहली पहिलो ओभरको चौथो बलमा आकाश सिंहको बलमा ६ रनमा बोल्ड भएका थिए ।

महिपाल लोमर शून्यमा क्याच आउट भए । म्याक्सवेल र डु प्लेसिसको शतकीय साझेदारी स्पिनर महेश थिक्सेनाले तोडेका थिए । उनले विकेटकिपर धोनीबाट क्याच गराउँदै उक्त साझेदारीमा पूर्णविराम लगाए । डु प्लेसिस पनि मोईन अलीको बलमा धोनीबाट क्याच आउट भए ।

दीनेश कार्तिक १४ बलमा ३ चौका र १ छक्कासहित २८ रनमा क्याच आउट भए । बेंगलोरलाई जितको लागि अन्तिम १८ बलमा ३५ रन चाहिँएको थियो । १८ औं ओभरमा युवा तीव्र गतिका बलर मथिसा पाथिरानाले मात्रै ४ रन खर्चेर १ विकेट लिएपछि चेन्नई जिततर्फ अघि बढेको थियो । शहबाज अहमद १२, सुयश प्रभुदेशाई १९ र वायन पार्नेल २ रनमा आउट भए ।

चेन्नईका तीव्र गतिका बलर तुषार देशपान्डेले ४ ओभरमा ४५ रन खर्चेर सर्वाधिक तीन विकेट लिए । मथिसा पाथिरानाले दुई, आकाश सिंह, मोईन अली र महेश थिक्सेनाले समान एक विकेट लिए ।

त्यसअघि बेंगलोरको घरेलु मैदान चिन्नास्वामीमा टस हारेर पहिला ब्याटिङको निम्तो पाएको चेन्नईले निर्धारित २० ओभरमा ६ विकेट गुमाउँदै २ सय २६ रन बनाएको थियो। चेन्नईको जितमा ओपनर डेभन कन्वेले ४५ बलमा ६ चौका र ६ छक्कासहित सर्वाधिक ८३ रनको योगदान दिएका थिए ।

शिबम दुबे २७ बलमा २ चौका र ५ छक्कासहित ५२ रनमा आउट भए । तेस्रो विकेटका लागि दुबे र कन्वेले ३७ बलमा ८० रनको साझेदारी गर्दै विशाल योगफलको आधार तय गरेका थिए । तीव्र गतिका बलर हर्षल पटेलको १६ औं ओभरको चौथो बलमा कन्वे फुलटस बलमा बोल्ड भएपछि साझेदारीमा ब्रेक लागेको थियो ।

चेन्नईले ओपनर ऋतुराज गायकवाडलाई तीन रनमै गुमाएको थियो । तर दोस्रो विकेटका लागि कन्वे र अजिंक्या रहाणेले ४३ बलमा ७४ रनको उत्कृष्ट साझेदारीका साथ सानदार सुरुवात दिलाएका थिए । रहाणे २० बलमा ३ चौका र २ छक्कासहित ३७ रन जोड्दै आउट भए ।

अम्बाती रायुडू ६ बलमा १ चौका र १ छक्कासहित १४ रनमा आउट भए । मोईन अली ९ बलमा २ छक्कासहित १९ रनमा अविजित रहँदा रविन्द्र जडेजा १० रनमा आउट भए । कप्तान महेन्द्रसिंह धोनी १ बलमा एक रनमा अविजित रहे ।

बेंगलोरका विजयकुमार वैश्यकले ४ ओभरमा ६२ रन खर्चेर १ विकेट लिए । मोहम्मद शिराज, वेन पार्नेल, वानिन्दु हसरंगा, हर्षल पटेल र ग्लेन म्याक्सवेलले समान एक विकेट लिए ।

चेन्नई पहिलो खेलमा गुजरात टाइटन्ससँग पाँच विकेटले पराजित भएको थियो । त्यसपछि चेन्नईले लखनऊलाई १२ रन र मुम्बईलाई ७ विकेटले हराएको थियो । अन्तिम खेल राजस्थान रोयल्ससँग तीन रनले पराजित भएको थियो । चेन्नई शुक्रबार सनराइजर्स हैदराबादसँग खेल्नेछ ।

बेंगलोरले पहिलो खेलमा मुम्बईलाई ८ विकेटले हराएको थियो । त्यसपछि कोलकातासँग ८१ रन र लखनऊसँग एक विकेटले पराजित भएको थियो । दिल्लीलाई २३ रनले हराएको थियो । बेंगलोरले बिहीबार पन्जाब किंग्ससँग खेल्नेछ ।

चेन्नई ५ खेलमा ३ मा जित र २ मा हारसहित तेस्रो स्थानमा छ । राजस्थान रोयल्स ५ खेलमा ४ मा जित र १ मा हारसहित ८ अंकका साथ शीर्ष स्थानमाछ । लखनऊ ५ खेलमा ३ मा जित र २ मा हारसहित ६ अंकका साथ नेटरनरेटमा माथि रहँदै दोस्रो स्थानमा छ । बेंगलोर ५ खेलमा २ मा जित र ३ मा हारसहित सातौं स्थानमा छ । दिल्ली पाँचै खेलमा पराजित हुँदै पुछारमा छ ।