एजेन्सी – कप्तान बाबर आजमको उत्कृष्ट शतकमा पाकिस्तानले दोस्रो टि२० आई खेलमा न्युजिल्यान्डलाई ३८ रनले पराजित गरेको छ । लगातार दोस्रो जितसँगै घरेलु टोली पाकिस्तानले पाँच टि२० आई खेलको सिरिजमा २–० को अग्रता लिएको छ ।

जितको लागि १ सय ९३ रनको विजयी लक्ष्य पछ्याएको न्युजिल्यान्डले २० ओभरमा ७ विकेट गुमाउँदै १ सय ५४ रन बनायो । न्युजिल्यान्डका मार्क च्यापम्यानले ४० बलमा ४ चौका र ४ छक्कासहित सर्वाधिक ६५ रनमा अविजित रहे । अन्य कुनैपन ब्याटरले राम्रो प्रदर्शन गर्न सकेनन् ।

ओपनर तथा कप्तान टम लाथम १९, चाद वोवेस २६, विल योंग र डर्याल मिचेल ९–९ रनमा आउट भए । पाकिस्तानका तीव्र गतिका बलर हरिस रौफले ४ ओभरमा २७ रन खर्चेर ४ विकेट लिए । शादब खान, इमाद वासिम र जमान खानले समान एक एक विकेट लिए ।

त्यसअघि गद्धाफी स्टेडियम लाहोरमा टस जितेर पहिला ब्याटिङ रोजेको पाकिस्तानले निर्धारित २० ओभरमा ४ विकेट गुमाउँदै १ सय ९२ रन बनायो । पाकिस्तानका कप्तान बाबर आजम ५८ बलमा ११ चौका र ३ छक्कासहित १ सय १ रनमा अविजित रहे ।
उनले जेम्श निसमलाई अन्तिम दुई बलमा लगातार चौकाका साथ शतक पूरा गरेका थिए ।

बाबरको यो टि२० आई करिअरको तेस्रो शतक हो । अर्का ओपनर मोहम्मद रिजवान ३४ बलमा ६ चौका र १ छक्कासहित ५०, इमाद वासिम दुई, फखार जमान र सैम अयुब डक आउट भए ।

पहिलो विकेटका लागि बाबर र मोहम्मद रिजवानले १०.४ ओभरमा ९९ रनको साझेदारी गरेका थिए । इफ्तिखर अहमद १९ बलमा १ चौका र ३ छक्कासहित ३३ रनमा अविजित रहे ।

न्युजिल्यान्डका म्याट हेनरीले ४ ओभरमा २९ रन खर्चेर २ विकेट लिए । नसिम शाह र रचिन रविन्द्रले समान एक विकेट लिए । पहिलो खेलमा पाकिस्तान ८८ रनले विजयी भएको थियो । अव तेस्रो खेल सोमबार, चौथो खेल बिहीबार र पाँचौं खेल सोमबार हुनेछ ।