एजेन्सी – लखनऊ सुपर जायन्ट्सले इन्डियन प्रिमियर लिग (आइपिएल) २०२३ को २१ औं खेलमा पन्जाब किंग्सलाई १ सय ५९ रनको लक्ष्य दिएको छ । घरेलु मैदान एककानामा टस हारेर पहिला ब्याटिङको निम्तो पाएको लखनऊले निर्धारित २० ओभरमा ८ विकेट गुमाउँदै १ सय ५८ रन बनायो ।

लखनऊका ओपनर तथा कप्तान लोकेश राहुलले ५६ बलमा ८ चौका र १ छक्कासहित सर्वाधिक ७४ रन बनाए । पन्जाबलाई ओपनर कायल मेयर्स र राहुलले ७.४ ओभरमा ५३ रनको साझेदारी गर्दै राम्रो सुरुवात दिलाएका थिए । मेयर्स २३ बलमा १ चौका र ३ छक्कासहित २९ रनमा आउट भए ।

मेयर्स स्पिनर हरप्रीत ब्रारको बलमा ठूलो सट खेल्ने धुनमा डिप स्क्वायर लेगमा हरप्रीत सिंहबाट क्याच आउट भए । सिकन्दर राजाको बलमा दीपक हुडा दुई रनमा एलबीडब्लू आउट भए । बेंगलोरविरुद्ध १५ बलमै अर्धशतक हानेका निकोलस पुरन गोल्डेन डक आउट भए । रबाडाले पुरनलाई शाहरुख खानबाट क्याच गराएका थिए ।

क्रुनाल पान्ड्या १७ बलमा २ चौकासहित १८ रनमा रबाडाको बलमा आउट भए । मार्कस स्टोइनिस ११ बलमा २ छक्कासहित १५ रनमा विकेटकिपर जितेश शर्माबाट क्याच गराए । कप्तान साम करनले आफ्नो बलमा रिभ्यु लिँदै पेभेलिएन फर्काएका थिए ।

पन्जाबका कागिसो रबाडाले ४ ओभरमा ३४ रन खर्चेर २ विकेट लिए । कप्तान साम करनले ४ ओभरमा ३१ रन खर्चेर ३ विकेट लिए । अर्शदीप सिंह, हरप्रीत ब्रार र सिकन्दर राजाले समान एक विकेट लिए । यस खेलमा पन्जाबको कप्तानी साम करनले गरेका छन् । शिखर धवन घाइते भएपछि साम करनले कप्तानी गरेका हुन् ।