काठमाडौं (हाम्रो खेलकुद) – विराटनगरमा जारी रिचा ममोरियल टि२० क्रिकेट प्रतियोगिता दोस्रो दिन नेपाल आर्मी क्लब र नेपाल एपिएफ क्लब विजयी भएका छन् । एपिएफले राहुल ११ लाई ५ विकेटले हरायो । जितको लागि १ सय ३९ रनको विजयी लक्ष्य पछ्याएको एपिएफले १८.३ ओभरमा ५ विकेट गुमाउँदै पूरा गर्यो ।

एपिएफको जितमा विपिन खत्रीले ३० बलमा ३ चौका र ३ छक्कासहित सर्वाधिक ४० रनमा अविजित रहे । अमरसिंह राउटेला १९ बलमा ४ चौकासहित २२, प्रज्वल थापा १७, सुमित महर्जन १३, प्रदीपऐर २५, अरुण ऐरी ६ र पुरन विकले ७ रन बनाए ।

राहुल ११ का अमन यादवले ४ ओभरमा २१ रन खर्चेर ३ विकेट लिए । अमर चौधरीले ४ ओभरमा १८ रन खर्चेर २ विकेट लिए ।
त्यसअघि टस हारेर पहिला ब्याटिङको निम्तो पाएको राहुल ११ ले १६.३ ओभरमा १ सय ३८ रनमा अल आउट भएको थियो ।

ओपनर अभिषेक पाठकले १२ बलमा १ चौका र ७ छक्कासहित सर्वाधिक ४६ रन बनाए । भानु यादव २६, सचिन २० र रबाडा कुमारले १९ रन बनाए । एपिएफका अमर, यज्ञमान कुमाल, पुरन विक र त्रिलोकले समान दुई विकेट लिए । विपिन खत्री र अरुणले एक एक विकेट लिए ।

त्यस्तै अर्को खेलमा आर्मीले सिद्धान्त लोहनी कप्तान रहेको वाइआरसिसीलाई ७ विकेटले हरायो । टस जितेर पहिला ब्याटिङ रोजेको वाइआरसिसी १९.५ ओभरमा १० विकेट गुमाउँदै १ सय ५५ रन बनायो । ओपनर अभिषेक चौधरीले २६ बलमा २ चौका र २ छक्कासहित ३१ र सिद्धान्त लोहनीले १६ बलमा ६ चौकासहित २८ रन बनाए ।

सोनु अन्सारीले ३७ बलमा ४ चौका र ६ छक्कासहित ६० रनको उत्कृष्ट इनिङ खेले । आर्मीका जितेन्द्र मुखियाले ४ ओभरमा २ मेडनसहित १२ रन खर्चेर ३ विकेट लिए । विक्रम सोब र सुमित श्रेष्ठले समान दुई विकेट लिए । आकाश चन्द र हरि चौहानले एक एक विकेट लिए ।

जितको लागी १ सय ५६ रनको विजयी लक्ष्य पछ्याएको आर्मीले १५.१ ओभरमा ३ विकेट गुमाउँदै पूरा गर्यो । आर्मीको जितमा बसिर अहमद ३३ बलमा ६ चौका र १ छक्कासहित ४४ रनमा अविजित रहे । सन्दीप रजाली १५ बलमा ३ चौका र ३ छक्कासहित ३६ राजेश पुलामी २४ र हरि चौहानले २६ बलमा ५ चौका र २ छक्कासहित ३८ रन बनाए ।