चौथो क्याची एसएसपी कप क्रिकेट प्रतियोगिता

राकेश तिमल्सिना
चितवन – लगातार दोस्रो खेल जित्दै कृषि तथा वन विश्वविद्यालय, रामपुर चौथो क्याची एसएसपी कप क्रिकेट प्रतियोगिताको सेमिफाइनलमा पुगेको छ । भरतपुरको अर्किड कलेजलाई मंगलबार ८ विकेटले हराएपछि रामपुर समूह ए को बिजेताका रुपमा प्रतियोगिताको अन्तिम चारमा पुगेको हो ।

८५ रनको सामान्य लक्ष्य पछ्याएको रामपुरले १२.४ ओभरमा मात्र दुई विकेट गुमाएर जित हासिल गरेको थियो । रामपुरलाई जित दिलाउन पवन थापाले अविजित ४६ बनाए । उनले ३८ बलमा ६ चौका प्रहार गरे । विशाल चोकस्थित नौ बिगाहा मैदानमा त्यसअघि टस जितेर ब्याटिङ रोजेको अर्किडले निर्धारित २० ओभरमा ८ विकेट गुमाउदै ८४ रन बनाएको थियो ।

अर्किडका लागि राजेश लम्सालले १८ र सन्तोष उपाध्यायले १६ जोडे । अन्य ब्याट्सम्यानले गतिलो प्रदर्शन गर्न सकेनन् । बलिङतर्फ रामपुरका सनम बुढाथोकीले २ विकेट लिए । म्यान अफ द म्याच घोषित रामपुरका पवनले डिटिसीको मोबाइल सेट प्राप्त गरे ।

समूहका दुई मध्ये एक खेल जितेको अर्किड प्रतियोगिताबाट बाहिरिएको छ भने दुवै खेल हारेको प्रेसिन्डेसी कलेज यसअघि नै बाहिरिसकेको थियो । क्याची एजुकेशन कन्सलटेन्सी मुख्य प्रायोजक रहेको प्रतियोगितामा १२ टोलीको सहभागिता रहेको छ ।

क्याची एसएसपी कपमा बुधबारको खेल
– वीरेन्द्र बहुमुखी क्याम्पस, भरतपुरविरुद्ध ग्रेट हिमालयन क्रिकेट एकेडेमी (बिहान ८ः३० बजे)
– सुदुर पश्चिम एकेडेमी, धनगढीविरुद्ध नेपाल पोलिटेक्निक कलेज, भरतपुर (दिउँसो १२ः३० बजे)