एजेन्सी – नेपाली महिला क्रिकेट टोलीकी कप्तान रुविना क्षेत्री बेलबासेको कसिलो बलिङमा बर्मी आर्मीले हङकङमा जारी फेयर ब्रेक टि२० क्रिकेट प्रतियोगितामा वारियर्स वुमन्सलाई १७ रनले हराएको छ।

जितको लागि १ सय ६४ रनको विजयी लक्ष्य पछ्याएको वारियर्स निर्धारित २० ओभरमा १ सय ४६ रनमा अल आउट भयो । उसको लागि क्याथरिन ब्राइसले २६ बलमा ४ चौका र २ छक्कासहित सर्वाधिक ४५ रन बनाइन् । ओपनर हेली म्याथ्युज १८ बलमा ३ चौकासहित २८ र यासिमा खानले १५ रन बनाइन् । अन्य कुनैपनि ब्याटरले राम्रो प्रदर्शन गर्न सकेनन् ।

बर्मी आर्मीकी रुविनाले ३ ओभरमा १६ रन खर्चेर १ विकेट लिइन् । रुविनाले १८ बल गर्दा कुनैपनि चौका र छक्का खर्चिनन् । तारा नोरिस र डोटिनले समान दुई विकेट लिइन् ।

रुविनाले आठौं ओभरमा मात्रै तीन रन दिँदै उत्कृष्ट सुरुवात गरेकी थिइन् । उनले ६ मध्य ४ बल डट राखेकी थिइन् । यासमिन खानलाई रुविनाले सुरुवाती तीन बल डट राख्दा चौथो बलमा दुई, पाँचौंमा एक र अन्तिम बलमा डट राखिन् ।

१४ औं ओभरमा रुविनाले मात्रै ७ रन खर्चिन् । कप्तान सिन्धु श्रीहर्ष र क्यानरिनविरुद्ध रुविनाले राम्रो बलिङ गरिन् । उनले पहिलो बलमा सिन्धुलाई एक रन दिँदा त्यसपछिका दुई बलमा दुई दुई रन खर्चेकी थिइन् । चौथो बलमा डट, पाँचौं र छैटौं बलमा एक एक रन खर्चिन् ।

१६ औं ओभरमा रुविनाले कप्तान सिन्धुको विकेटसहित मात्रै ६ रन खर्चेकी थिइन् । सुरुवाती दुई बलमा एक एक रन दिइन् । तेस्रो बलमा कप्तान सिन्धु नोरिसबाट १४ रनमा क्याच भएकी थिइन् । चौथो बलमा एक, पाँचौंमा दुई र अन्तिम बलमा एक रन दिएकी थिइन् ।

त्यसअघि टस हारेर पहिला ब्याटिङ थालेको बर्मीले निर्धारित २० ओभरमा ६ विकेट गुमाउँदै १ सय ६३ रन बनायो । बर्मीकी डिआन्ड्रा डोटिनले ४८ बलमा ३ चौका र ७ छक्कासहित सर्वाधिक ६९ रन बनाएकी थिइन् । बमीले बुधबार शफरिससँग खेल्नेछ ।