एजेन्सी – ओपनर टिम सिफर्टको सानदार ब्याटिङको सहयोगमा न्युजिल्यान्डले तेस्रो तथा अन्तिम टि२० आई खेलमा श्रीलंकालाई ४ विकेटले पराजित गरेकोछ । योसँगै घरेलु टोली न्युजिल्यान्डले तीन टि२० आई खेलको सिरिज २-१ ले जितेको छ ।

जितको लागि १ सय ८३ रनको विजयी लक्ष्य पछ्याएको न्युजिल्यान्डले १९.५ ओभरमा ६ विकेट गुमाउँदै पूरा गर्यो । अन्तिम ओभरमा न्युजिल्यान्डलाई जितको लागि ६ बलमा १० रन चाहिँएको थियो । मार्क च्यापम्यानले पहिलो बलमै लाहिरु कुमारलाई ओभर मिड विकेटमा छक्का हानेका थिए । तर दोस्रो बलमा उनी १६ रनमा चरिथ असलंकाबाट क्याच आउट भए ।

तेस्रो वाइड बलमा जेम्श निसम रन आउट भए । तेस्रो बलमा डर्याल मिचेल दासुन शानकाबाट १५ रनमा क्याच आउट भए । चौथो बलमा एडम मिल्नेले एक रन बटुले । अन्तिम दुई बलमा दुई रन चाहिँएको अवस्थामा रचिन रविन्द्रले पाँचौं बलमा खेल जिताएका थिए ।

न्युजिल्यान्डको जितमा टिम सिफर्टले ४८ बलमा १० चौका र ३ छक्कासहित ८८ रनको उत्कृष्ट इनिङ खेले । ओपनर चास बोवेस १७, टम लाथम ३१ रनमा आउट भए । श्रीलंकाका लाहिरु कुमाराले ३.५ ओभरमा ३८ रन खर्चेर ३ विकेट लिए । महेश थिक्सेना र प्रमोद मदुशानले एक एक विकेट लिए ।

त्यसअघि क्विन्सटाउनमा टस हारेर पहिला ब्याटिङ थालेको श्रीलंकाले निर्धारित २० ओभरमा ६ विकेट गुमाउँदै १ सय ८२ रन बनाएको थियो । श्रीलंकाका कुशल मेन्डिसले ४८ बलमा ६ चौका र ४ छक्कासहित ७३ रनको उत्कृष्ट इनिङ खेलेपनि टोलीको हार टार्न सकेनन् । ओपनर पाथुम निसांका २५, कुशल पेरेरा ३३, धनन्जय डि सिल्भा २०, दासुन शानका १५ र चरिस असलंकाले ३ रन बनाए ।

न्युजिल्यान्डका बेन लिस्टरले दुई विकेट लिए । एडम मिल्ने र ईश सोधीले एक एक विकेट लिए । पहिलो खेलमा श्रीलंका सुपर ओभरमा विजयी भएको थियो । दोस्रो खेलमा न्युजिल्यान्ड ९ विकेटले विजयी भएको थियो ।