एजेन्सी – अलराउन्डर शार्दुल ठाकुरको विष्फोटक ब्याटिङमा घरेलु टोली कोलकाता नाइट राइडर्सले इन्डियन प्रिमियर लिग (आइपिएल) २०२३ को नवौं खेलमा रोयल च्यालेन्जर्स बेंगलोरलाई २ सय ५ रनको विशाल लक्ष्य दिएको छ ।

इर्डेन गार्डेन टस हारेर पहिला ब्याटिङको निम्तो पाएको कोलकाताले निर्धारित २० ओभरमा ७ विकेट गुमाउँदै २ सय ४ रन बनायो । कोलकाताका शार्दुल ठाकुरले २९ बलमा ९ चौका र ३ छक्कासहित सर्वाधिक ६८ रनको विष्फोटक इनिङ खेले ।

एक समय ११.३ ओभरमा ८९–५ को दयनीय अवस्थामा पुगेको कोलकातालाई विशाल योगफलमा पुर्याउन ठाकुरले विष्फोटक ब्याटिङ गर्दै नाटकीय पूनरागमन गराएका थिए । उनको आइपिएलमा पहिलो अर्धशतक हो ।

रिंकु सिंह ३३ बलमा २ चौका र ३ छक्कासहित ४६ रनमा क्याच आउट भए । छैटौं विकेटका लागि रिंकु र शार्दुले ४७ रनको १ सय ३ सानदार साझेदारी गरेपछि कोलकाता खेलमा फर्किएको थियो ।

कोलकाताका ओपनर रहमानउल्लाह गुरबाजले ४४ बलमा ६ चौका र ३ छक्कासहित ५७ रनमा आउट भए । उनको यो पहिलो आइपिएल अर्धशतक हो । गुरबाजले पहिलो खेलमा पन्जाब किंग्ससँग डेब्यू गरेका थिए । गुरबाज बाहेक अन्य शीर्ष र मध्यक्रमका ब्याटरको प्रदर्शन राम्रो हुन सकेन ।

तीव्र गतिका बलर डेविड विल्लीले चौथो ओभरमा लगातार दुई विकेट लिँदै कोलकातालाई दबाबमा राखेका थिए । विल्लीले दोस्रो बलमा ओपनर वेंकटेश ऐरलाई ३ रनमा बोल्ड गरे । लगत्तै अर्को बलमा मन्दीप सिंहलाई शून्यमा बोल्ड हुँदै पेभेलिएन फर्काए ।

कप्तान नितिश राणा स्पिनर माइकल ब्रेसवेलको बलमा रिभरस्वीप हान्ने धुनमा एक रनमा विकेटकिपर दीनेश कार्तिकबाट क्याच आउट भए । स्पिनर कर्ण शर्माले १२ औं ओभरमा दुई विकेट लगातार लिएका थिए ।

दोस्रो बलमा गुरबाज आकाश दीपबाट क्याच आउट भए । लगत्तै अर्को बलमा आन्द्रे रसेल लङअफमा क्याच आउट भएपछि कोलकाता ८९–५ को दयनीय अवस्थामा पुगेको थियो ।

बेंगलोरका कर्ण शर्माले ३ ओभरमा २६ रन खर्चेर २ विकेट लिए । डेविड विल्लीले ४ ओभरमा १ मेडनसहित १६ रन खर्चेर २ विकेट लिए । हर्षल पटेलले ३ ओभरमा ३४ रन खर्चेर १ विकेट लिए । मोहम्मद शिराजले ४ ओभरमा ४४ रन खर्चेर १ विकेट लिए ।