एजेन्सी – इन्डियन प्रिमियर लिग (आइपिएल) २०२३ को नवौं खेलमा आज रोयल च्यालेन्जर्स बेंगलोरले कोलकाता नाइट राइडर्ससँग खेल्दैछ । खेल नेपाली समय अनुसार ७: ४५ मा कोलकाताको घरेलु मैदान इर्डेन गार्डेनमा सुरुहुनेछ।

बेंगलोर लगातार दोस्रो जितको सोचमा छ । कोलकाता पहिलो जित निकाल्न चाहन्छ । बेंगलोरले पहिलो खेलमा मुम्बई इन्डियन्सलाई ८ विकेटले हराएको थियो । मुम्बईलाई हराउन विराट कोहलीले ८२ र कप्तान फाफ डु प्लेसिसले ७३ रन जोडेका थिए । पहिलो विकेटका लागि १ सय ४८ रनको सानदार शतकीय साझेदारी गरेका थिए ।

पहिलो खेलमै उच्च प्रदर्शन गरेको हुँदा बेंगलोरको मनोबल उच्च छ । विराट कोहली र फाफ डु प्लेसिस प्रमुख ब्याटर हुन् । दोस्रो खेलमा पनि यी दुई खेलाडीबाट उत्कृष्ट प्रदर्शन चाहन्छ । ग्लेन म्याक्सवेल र माइकल ब्रेसवेल मध्यक्रमका ब्याटर हुन् । यी दुई ब्याटरको प्रदर्शनले मध्यक्रम निर्भर हुनेछ । दीनेश कार्तिक फिनिसरको रुपमा खेल्नेछन् ।

तीव्र गतिका बलरमा रिस टोप्ली, मोहम्मद शिराज, आकाश दीप र हर्षल पटेल छन् । पहिलो खेलमा रिस टोप्ली घाइते भएका थिए । उनको स्थानमा आज एक ब्याटरलाई खेलाउन सक्छ । इर्डेन गार्डेनको पिच ब्याटिङ सहयोगी मानिन्छ । फिन एलेन आक्रामक ब्याटिङका लागि चिनिन्छन् । स्पिनरमा कर्ण शर्मा, ब्रेसवेल र म्याक्सवेल हुनेछन् ।

उता कोलकाता पहिलो खेलमा पन्जाब किंग्स डकवर्थ लेविस पद्धतिको आधारमा ७ रनले पराजित भएको थियो । कप्तान श्रेयस ऐर चोटका कारण बाहिरिएको हुँदा ब्याटिङमा समस्या परेकोछ । इंग्ल्यान्डका ओपनर जेसन रोयलाई टोलीमा लिएकोछ । उनीबाट सुरुवातमा ठूलो आशा राख्नेछ ।

कप्तान नितिश राणा, वेंकटेश ऐर र रहमानउल्लाह गुरबाजले जिम्मेवारीका साथ इनिङलाई अघि बढाउनु पर्छ । राम्रो सुरुवात पाउँदा भने आन्द्रे रसेलले विष्फोटक अन्त्य गर्न सक्छ । सुरुवातनै खराब भएमा रसेललाई पनि दबाब हुनेछ । शार्दुल ठाकुर, उमेश यादव र टिम साउथी प्रमुख बलर हुन् । बरुण चक्रवर्ती र सुनिल नारायण स्पिनरको रुपमा छन् ।

हेड टु हेड :

आइपिएलमा कोलकाता र बेंगलोरबीच ३० खेल भएकोछ । जसमा कोलकाता १६ खेलमा विजयी हुँदा १४ खेलमा पराजित भएको छ । पछिल्ला पाँच खेलमा बेंगलोर तीन खेलमा विजयी हुँदा दुई खेलमा पराजित भएको छ ।