एजेन्सी – युएईले आइसिसी विश्वकप क्वालिफायर प्लेअफमा आफ्नो अन्तिम खेलमा जर्सीलाई ६६ रनले पराजित गरेको छ । युएई दोस्रो स्थानमा रहँदै ओडिआई मान्यता बचाउनुको साथै विश्वकप छनोटमा स्थान पक्का भने यस खेल अगावै पुगेको थियो ।

जितको लागि २ सय ८५ रनको विशाल विजयी लक्ष्य पछ्याएको जर्सी ४४.५ ओभरमा २ सय १८ रनमा अल आउट भयो । जर्सीका ओपनर ह्यारिसन कार्लियोनले ८९ बलमा ७ चौका र ५ छक्कासहित ८५ रनको उत्कृष्ट इनिङ खेलेपनि टोलीका हार टार्न सकेनन् ।

अशा ट्राइब ४८ बलमा १ चौका र २ छक्कासहित ४०, जोन्टी जेनर ३२, जोश लरेन्सन १३ र निक ग्रीनवुडले १० रन बनाए । युएईका स्पिनर कार्तिक मयाप्पनले १० ओभरमा ५७ रन खर्चेर सर्वाधिक ४ विकेट लिए । जुनैद सिद्धिकले तीन र जहुर खानले दुई विकेट लिए ।

त्यसअघि विन्डहोकमा टस जितेर पहिला ब्याटिङ रोजेको युएईले निर्धारित ५० ओभरमा ७ विकेट गुमाउँदै २ सय ८४ रन बनाएको थियो । युएईको जितमा आसिफ खानले ८६ बलमा ५ चौका र २ छक्कासहित सर्वाधिक ८२ रन बनाए । युएईका कप्तान मोहम्मद वासिम ५२ बलमा ५ चौका र ४ छक्कासहिति ६५ रनमा आउट भए ।

डेब्यू खेल खेलेका अर्यांश शर्मा डक आउट भए । वृत्य अरविन्द ७७ बलमा ४ चौकासहित ४५, अंश टन्डन १० र सन्चित शर्मा २३ रनमा आउट भए । आयन खान ४९ बलमा ३ चौासहित ४३ रनमा आउट भए । जर्सीका तीव्र गतिका बलर जुलिस सुमेराउरले १० ओभरमा १ मेडनसहित ५१ रन खर्चेर ४ विकेट लिए । चाल्र्स पेर्चार्डले दुई विकेट लिए ।

युएई ५ खेलमा ४ मा जित र १ मा हारसहित ८ अंकका साथ दोस्रो स्थानमा रह्यो । अमेरिका ५ खेलमा ४ मा जित र १ मा हारसहित ८ अंकका साथ नेटरनरेटका कारण शीर्ष स्थानमा रहे । अमेरिका र युएई आगमी जुन जुलाईमा जिम्बावेमा हुने विश्वकप छनोटमा स्थान बनाएका छन् ।

क्यानडा ५ खेलमा ३ मा जित र २ मा हारसहित चौथो स्थानमा रह्यो । क्यानडा र युएईले ओडिआई मान्यता पाएका छन् । अमेरिका र नामिबियाले लिग २ बाटनै ओडिआई मान्यता पाएका थिए । नामिबिया भने ५ खेलमा ३ मा जित र २ मा हारसहित तेस्रो स्थानमा रहेर विश्वकप दौडबाट बाहिरियो ।

जर्सी ५ खेलमा १ मा जित र ४ मा हारसहित पाँचौं स्थानमा रह्यो । पपुवा न्युगिनी सबै खेलमा पराजित हुँदै आगमी चार वर्षको लागि ओडिआई मान्यता नै गुमायो ।