एजेन्सी – पन्जाब किंग्सका युवा अलराउन्डर राज अंगद बावाले इन्डियन प्रिमियर लिग (आइपिएल) २०२३ गुमाउने भएका छन् । उनले आइपिएल गुमाउने भएपछि पन्जाबले २२ वर्षीय अलराउन्डर गुरनुर ब्रारलालाई टोलीमा भित्र्याएको छ ।

गुरनुरलाई २० लाख भारुमा भित्र्याएको हो । बावाको बायाँ हातको कुममा चोटपछि आइपिएल गुमाउने भएका हुन् । गुरनुर बायाँ हाते ब्याटर हुन् । बलिङ भने दायाँ हाते तीव्र गतिका बलर हुन् । पन्जाबबाट घरेलु क्रिकेट खेल्ने गुरनुरले गत डिसेम्बरमा रणजी ट्रफीमा डेब्यू गरेका थिए ।

उनले ५ प्रथम श्रेणी खेलमा १ सय ७ रन बनाउनुको साथै ७ विकेट लिएका छन् । गतवर्ष डिसेम्बरमा गोवाविरुद्ध लिष्ट ए मा डेब्यू गरेका थिए । टि२० खेल भने खेलेका छैनन् । बावा भने गतवर्ष रोयल च्यालेन्जर्स बेंगलोरविरुद्ध डेब्यू गरेका थिए । भारतलाई २०२२ को यू-१९ विश्वकप उपाधि जिताउन बावाले फाइनलमा इंग्ल्यान्डविरुद्ध ५ विकेट लिएका थिए ।

उक्त विश्वकपमा उनले युगान्डाविरुद्ध १ सय ८ बलमा १४ चौका र ८ छक्कासहित १ सय ६२ रनको सानदार शतकीय इनिङ खेलेका थिए । उनी भारतीय यू-१९ क्रिकेट इतिहासमा एकै खेलमा सर्वाधिक रन बनाउने खेलाडी थिए । उनले २००४ मा शिखर धवनले स्कटल्यान्डविरुद्ध खेलेको १ सय ५५ रनको कीर्तिमान तोडेका थिए ।

पहिलो खेलमा पन्जाब किंग्सले कोलकाता नाइट राइडर्सलाई ७ रनले डकवर्थ लेविस पद्धतिको आधारमा पराजित गरेको थियो । पन्जाबले आज राजस्थान रोयल्ससँग खेल्दैछ ।