एजेन्सी – घरेलु टोली दिल्ली क्यापिटल्सले इन्डियन प्रिमियर लिग (आइपिएल) २०२३ को सातौं खेलमा साविक विजेता गुजरात टाइटन्सलाई १ सय ६३ रनको मध्यम लक्ष्य दिएको छ । अरुण जेट्ली स्टेडियममा टस हारेर पहिला ब्याटिङको निम्तो पाएको दिल्लीले निर्धारित २० ओभरमा ८ विकेट गुमाउँदै १ सय ६२ रन बनायो ।

दिल्लीका अक्षर पटेलले २२ बलमा २ चौका र ३ छक्कासहित ३६ रन जोडे । शीर्ष र मध्यक्रमका ब्याटर दोस्रो खेलमा पनि चल्न नसक्दा बलियो योगफल बनाउन चुकेको हो ।

ओपनर पृथ्वी शा मोहम्मद शामीको तेस्रो ओभरको चौथो बलमा ७ रनमै क्याच आउट भएका थिए । मोहम्मद शामीले मिचेल मार्श ४ रनमा बोल्ड गर्दै उत्कृष्ट सुरुवात दिलाए ।

अल्जारी जोशेफले नवौं ओभरको दोस्रो बलमा कप्तान डेविड वार्नरलाई ३७ रनमा बोल्ड गरे । वार्नरले ३२ बलमा ७ चौका हाने । लगत्तै अर्को बलमा राइली रोसोउ गोल्डेन डक पेभेलिएन फर्केपछि दिल्ली दबाबमा परेको थियो । लगातार दुई विकेटपछि दिल्ली कुनैपनि समय खुलेर खेल्न सकेन ।

डेब्यू खेल खेलेका विकेटकिपर अभिषेक पोरेल ११ बलमा २ छक्कासहित २० रनमा आउट भए । शरफराज खान ३४ बलमा २ चौकासहित ३० रनमा आउट भए ।

गुजरातका राशिद खानले ४ ओभरमा ३१ रन खर्चेर ३ विकेट लिए । अल्जारी जोशेफले ४ ओभरमा २९ रन खर्चेर २ विकेट लिए । मोहम्मद शामीले ४ ओभरमा ४१ रन खर्चेर ३ विकेट लिए ।