काठमाडौं (हाम्रो खेलकुद) – तेस्रो संस्करणको बलियो नेपाल कप यू–१९ क्रिकेट प्रतियोगिता पोखरामा हुने भएको छ । बलियो नेपाल पोषण अभियानको आयोजनामा बुधबारदेखि पोखरा रंगशालामा प्रतियोगिता सञ्चालन हुने भएको छ ।

आयोजकले मंगलबार पोखरामा एक पत्रकार सम्मेलन गर्दै प्रतियोगितामा ६ टिमको सहभागीता रहेको जानकारी दिएको हो । इलाम, कर्णाली, स्टार, जनकपुर, पोखरा क्रिकेट एकेडेमी, पल्सर क्रिकेट एक्सीलेन्स सेन्टरले सहभागीता रहेको बलियो नेपाल पोषण अभियानको वित्त तथा प्रशासन व्यवस्थापक प्रकाश बख्रेलले जानकारी दिएका थिए ।

लिग कम नकआउटको आधारमा टि–२० फर्मयाटमा प्रतियोगिताका खेलहरु सञ्चालन हुनेछन् । पहिलो खेल पल्सर क्रिकेट एक्सीलेन्स सेन्टर र कर्णाली क्रिकेट एकेडेमीले प्रतिस्पर्धा छन् ।

प्रतियोगिताको विजेताले ५० हजार रुपैयाँ र उपविजेताले २५ हजार हजार रुपैयाँ प्राप्त गर्नेछन । इमर्जिङ प्लेयरले ५ हजार रुपैयाँ, उत्कृष्ट बलर र ब्याटरले समान ७ हजार तथा प्लेयर अफ दि सिरीजले १० हजार रुपैयाँ पुरस्कार प्राप्त गर्नेछन् । हरेक खेलमा म्यान अफ दि म्याचले २५ सय रुपैयाँ पाउनेछन् ।

यो तेस्रो संस्करणको प्रतियोगिता हो । अघिल्लो वर्ष लुम्बिनी प्रदेशका १२ जिल्लाको सहभागितामा पहिलो संस्करण र दोस्रो संस्करण यही वर्षको असारमा काठामाडौंमा भएको थियो । दोस्रो संस्करणमा ५ प्रदेशका टिमले प्रतिस्पर्धा गरेका थिए ।