एजेन्सी – नेपाली महिला क्रिकेट टोलीकी अनुभवी खेलाडी सीता रानामगर सम्मिलित टोर्नाडोस वुमन्स हङकङ जारी दोस्रो संस्करणको फेयर ब्रेक इन्भिटेसनल टि२० प्रतियोगिता पहिलो खेलमा फाल्कोन्स वुमन्ससँग ४१ रनले पराजित भएको छ ।

सोमबार दिउँसो भएको खेलमा जितको लागि १ सय ५१ रनको बलियो बिजयी लक्ष्य पछ्याएको टोर्नाडोसले निर्धारित २० ओभरमा ९ विकेट गुमाउँदै १ सय ९ रन बनायो ।

टोर्नाडोसकी सुने लुसले ३५ बलमा ५ चौका र २ छक्कासहित सर्वाधिक ४८ रन बनाईन् । अन्य कुनैपनी ब्याटरले राम्रो प्रदर्शन गर्न सकेनन् ।

फाल्कोन्सकी मरिजाने कप्पले ३ ओभरमा ४ रन खर्चेर ३ विकेट लिइन् । सोर्नारिन टिपोचले ४ ओभरमा १३ रन खर्चेर ३ विकेट लिइन् । कैआ अरुणाले ३ ओभरमा १० रन खर्चेर २ विकेट लिइन् ।

त्यसअघि हङकङको काउलुन क्रिकेट क्लबमा टस हारेर पहिला ब्याटिङको निम्तो पाएको फाल्कोन्सले २० ओभरमा ६ विकेट गुमाउँदै १ सय ५० रन बनाएको थियो ।

फाल्कोन्सकी युवा ब्याटर तिर्थ सतिशले ४० बलमा ७ चौका र २ छक्कासहित सर्वाधिक ५७ रन बनाईन् । त्यस्तै मारिको हिल २५ बलमा ३ चौका र २ छक्कासहित ३८ रनमा आउट भईन् ।

टोर्नाडोसकि सुने लुस र विनिफ्रेड दुराईसिंगमले समान दुई दुई विकेट लिइन् ।

सीता टोलीको प्लेइङ ११ मा भएपनी ब्याटिङ र बलिङको अवसर भने पाइनन् । फ्रेयर ब्रेकमा नेपाली महिला क्रिकेट टोलीकि कप्तान रुबिना क्षेत्री बेलबासेले पनि छिन् ।

रुबिनाले फ्रेयर ब्रेक बर्मी आर्मीबाट खेल्ने छिन् । आर्मीले मंगलबार स्पिरट वुमन्ससँग खेल्नेछ ।