एजेन्सी – न्युजिल्यान्ड तथा गुजरात टाइटन्सका प्रमुख ब्याटर केन विलियम्सन इन्डियन प्रिमियर लिग (आइपिएल) २०२३ गुमाउने भएका छन् । पहिलो खेलमै चेन्नई सुपर किंग्सविरुद्ध फिल्डिङ गर्नेक्रममा घाइते भएपछि विलियम्सन आइपिएल २०२३ बाट बाहिरिएका छन् ।

शुक्रबार राती चेन्नईविरुद्ध नरेन्द्र मोदी स्टेडियम अहमदाबादमा फिल्डिङ गर्नेक्रमा विलियम्सनको बायाँ खुट्टाको घुँडामा चोट लागेको थियो ।

तीव्र गतिका बलर जोशुवा लिटिलको १३ औं ओभरको तेस्रो बलमा डिप स्क्वायर लेगमा ऋतुराज गायकवाडले हानेको सट छक्का बचाउन खोज्दा उनी घाइते भएका थिए । विलियम्सनले उत्कृष्ट फिल्डिङ गर्दै छक्काबाट हुन बचाउँदै टोलीको दुई महत्वपूर्ण रन रोकेका थिए ।

तर ल्यान्डिङ गर्नेक्रममा दायाँ खुट्टाको घुँडामा चोट लागेको थियो । त्यसैले त्यसपछि उनले मैदान छाडेका थिए । त्यो समय निकै पीडादायीका साथ मैदान छाडेका थिए । उनलाई गुजरातका खेलाडी र म्यानेजमेन्ट टोलीले बोकेर लगेका थिए । उनी ब्याटिङमा पनि आएनन् । उनको स्थानमा गुजरातले इम्प्याक्ट प्लेयरको रुपमा साइ सुदर्शनलाई खेलाएको थियो । गुजरातले विलियम्सनले आइपिएल २०२३ पुरै खेल गुमाउने औपचारिक रुपमा जनाएको छ ।

विलियम्सन हैदराबादपछि पहिलो पटक गुजरातबाट आइपिएल खेलेका थिए । विलियम्सनले २०१५ देखि २०२२ सम्म हैदराबादबाट खेल्दै उत्कृष्ट प्रदर्शन गरेका थिए । २०१८ देखि २०२२ सम्म कप्तानी पनि गरेका थिए । उनलाई हैदराबादले फुकुवा गरेपछि अक्सनमा गुजरातले न्यूनतम २ करोड भारुमा अक्सनमा किनेको थियो ।

विलियम्सनले २०१८ को आइपिएलमा हैदराबादबाट ७ सय ३५ रनका साथ ओरेन्ज क्याप जितेका थिए । विश्व क्रिकेटकै एक सफल कप्तान विलियम्सनले ७७ आइपिएल खेलमा १८ अर्धशतकसहित कुल २ हजार १ सय १ रन बनाएका छन् ।

योसँगै विलियम्सनले आगमी अक्टोबर नोभेम्बरमा भारतमा हुने एकदिवसीय विश्वकप खेल्न सक्ने वा नसक्ने चिन्ता बढेको छ । उनी खेल्न नसके न्युजिल्यान्डलाई ठूलो धक्का लाग्नेछ ।