एजेन्सी – ओपनर काइल मेयर्सको उत्कृष्ट ब्याटिङमा लखनऊ सुपर जाउन्ट्सले इन्डियन प्रिमियर लिग (आइपिएल) २०२३ मा दिल्ली क्यापिटल्सलाई १ सय ९४ रनको विशाल लक्ष्य दिएको छ । टस हारेर पहिला ब्याटिङको निम्तो पाएको घरेलु टोली लखनऊले निर्धारित २० ओभरमा ६ विकेट गुमाउँदै १ सय ९३ रन बनायो ।

लखनऊका ओपनर काइल मेयर्सले ३८ बलमा २ चौका र ७ छक्कासहित ७३ रनको उत्कृष्ट इनिङ खेले । मेयर्स स्पिनर अक्षर पटेलको १२ औं ओभरको तेस्रो बलमा टर्न हुँदा बोल्ड भएका थिए । टर्न बल मेयर्सले चाल पाउन सकेनन् । त्यसअघि मेयर्सले ब्यक्तिगत १६ रनमा जीवनदान पाएका थिए ।

चेतनको छैटौं ओभरको तेस्रो बलमा खलिल अहमदले सहज क्याच छाड्दै जीवनदान दिएका थिए । ओपनर तथा कप्तान लोकेश राहुल १२ बलमा १ छक्कासहित ८ रनमा क्याच आउट भए । मध्यक्रमका ब्याटर निकोलस पुरन २१ बलमा २ चौका र ३ छक्कासहित ३६ रनमा क्याच आउट भए । पुरन खलिल अहमदको बलमा पृथ्वी शाबाट क्याच आउट भए ।

दीपक हुँडा १७, क्रुनाल पान्ड्या १४ र मार्कस स्टोइनिस १२ रनमा आउट भए । युवा ब्याटर आयुष बदोनी ७ बलमा १ चौका र २ छक्कासहित १८ रनमा आउट भए । इम्प्याक्ट प्लेयरको रुपमा अन्तिम बलमा मैदान आएका कृष्णप्पा गौतमले छक्का प्रहार गदै इनिङ सकाए ।

दिल्लीका खलिल अहमदले ४ ओभरमा ३० रन खर्चेर २ विकेट लिए । चेतन सकारियाले ४ ओभरमा ५३ रन खर्चेर २ विकेट लिए । कुलदीप यादवले ४ ओभरमा ३५ र अक्षर पटेलले ४ ओभरमा ३८ रन खर्चेर समान १-१ विकेट लिए ।