एजेन्सी – घरेलु टोली बंगलादेशले पहिलो टि२० आई खेलमा आयरल्यान्डलाई डिएलएस मेथर्डमा २२ रनले हराएको छ । योसँगै तीन टि२० आई खेलको सिरिजमा बंगलादेशले १–० को अग्रता लिएको छ । जितको लागि १ सय ४ रनको विजयी लक्ष्य पछ्याएको आयरल्यान्डले निर्धारित ८ ओभरमा ५ विकेट गुमाउँदै ८१ रन बनायो ।

आयरल्यान्डका ग्यारेथ डेलानी १४ बलमा ३ चौकासहित २१ रनमा अविजित रहे । ह्यारी टेक्टर १२ बलमा ३ चौकासहित १९ रनमा आउट भए । कप्तान पल स्टर्लिङ १३ र रस आदिर १३ रनमा आउट भए ।

बंगलादेशका तीव्र गतिका बलर तस्किन अहमदले २ ओभरमा १६ रन खर्चेर ४ विकेट लिए । हसन मोहम्मदले २ ओभरमा २० रन खर्चेर १ विकेट लिए ।

त्यसअघि जहुर अहमद चौधरी स्टेडियममा टस हारेर पहिला ब्याटिङको निम्तो पाएको बंगलादेशले १९.२ ओभरमा ५ विकेट गुमाउँदै २ सय ७ रन बनाउँदा वर्षाले खेल रोकिएको थियो । बंगलादेशका रोनी तालुकदारले ३८ बलमा ७ चौका र ३ छक्कासहित ६७ रनको उत्कृष्ट इनिङ खेले ।

ओपनर लिटन दास २३ बलमा ४ चौका र ३ छक्कासहित ४७ रनमा आउट भए । पहिलो विकेटका लागि दास र तालुकदारले ७.१ ओभरमा ९१ रनको साझेदारी गर्दै उत्कृष्ट सुरुवात दिलाएका थिए । शमिम हसन ३०, नाज्मुल हसन शान्टो १४ र तौहिद हृदोयले १३ रन बनाए । कप्तान सकिब अल हसन १३ बलमा ३ चौकासहित २० रनमा अविजित रहे ।

आयरल्यान्डका क्रेग योंगले ४ ओभरमा ४५ रन खर्चेर २ विकेट लिए । ह्यारी टेक्टर, मार्क आदिर र हुमेले एक एक विकेट लिए । दोस्रो खेल बुधबार र तेस्रो खेल शुक्रबार हुनेछ ।