काठमाडौं (हाम्रो खेलकुद) – सरस्वती कुमारी चौधरीको अलराउन्ड प्रदर्शनमा मधेश प्रदेशले ललितपुर वुमन्स च्याम्पियनसिप टि२० प्रतियोगितामा ललितपुर मेयर्स–११ माथि एक विकेटको रोमान्चक जित हात पारेको छ । मधेशले पहिलो जित हात पादै फाइनलको अंक गणीतिय सम्भावना कायमै राख्दा ललितपुर बाहिरिएको छ ।

जितको लागि ९७ रनको विजयी लक्ष्य पछ्याएको मधेशले १९.२ ओभरमा ९ विकेट गुमाउँदै पूरा गर्यो । जितको लागि अन्तिम ६ बलमा ५ रन चाहिँएको थियो । सरस्वतीले डिप मिडविकेटमा सृष्टि जैशीलाई चौका प्रहार गर्दै खेल सकाइन् । त्यसअघि पहिलो बलमा दुई रन लिनेक्रममा चांदनी खातुनलाई रन आउट गर्न ललितपुर चुकेको थियो ।

सरस्वती ३३ बलमा ३ चौकासहित ३२ रनमा अविजित रहिन् । ओपनर एलिसा यादव २० बलमा ३ चौकासहित १६ र सिमा कुँवर १२ बलमा १ चौकासहित १५ रनमा आउट भइन् । अन्य ब्याटरले भने राम्रो प्रदर्शन गर्न सकेनन् ।

ललितपुरकी कृतिका मरासिनीले ४ ओभरमा ११ रन खर्चेर २ विकेट लिइन् । सोनी पाख्रिन ४ ओभरमा २० रन खर्चेर २ विकेट लिइन् । अस्मिना कर्माचार्य र मनिषा उपाध्यायले एक एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङको निम्तो पाएको ललितपुरले निर्धारित २० ओभरमा ५ विकेट गुमाउँदै ९६ रन बनाएको थियो। ललितपुरकी सोनी पाख्रिनले ४३ बलमा ३ चौकासहित सर्वाधिक ३४ रन बनाइन् । विकेटकिपर लक्ष्मी चौधरी २७ बलमा ४ चौकासहित २३ तथा सृष्टी जैशी १८ बलमा १ चौकासहित १५ रनमा आउट भइन् ।

हेलिसा गुरुङ १, कन्चन श्रेष्ठ ५ रनमा आउट हुँदा अस्मिना कर्माचार्य ६ रनमा अविजित रहिन् । मधेशकी सरस्वती कुमारी चौधरीले ४ ओभरमा १ मेडनसहित ९ रन खर्चेर २ विकेट लिइन् । कविता गौतम, रोजी कडारी र अनुराधा चौधरीले एक एक विकेट लिइन् ।

मधेशको फाइनल पुग्ने झिनो सम्भावना छ । मधेश ३ खेलमा १ मा जित र २ मा हारसहित चौथो स्थानमा छ । आज सुदूरपश्चिम र कोशीबीच प्रतिस्पर्धा हुँदैछ । कोशीले सुदूरलाई हराउनुपर्ने हुन्छ । अन्तिम खेलमा मधेशले कोशीलाई हराउँदा तीन टोलीको समान ४-४ अंक हुनेछ ।

मधेश नेटरनरेटमा माथि रहँदै फाइनल खेल्न सक्छ । तर मधेशले बाँकी दुई खेलमा अविश्वसनीय रुपमा विशाल जित हात पार्नुपर्ने हुन्छ । अन्यथा नेटरनरेटको कारण बाहिरिनेछ ।

एपिएफ ३ खेलमा ६ अंकका साथ फाइनलमा पुगेको छ । सुदूरपश्चिम ३ खेलमा २ मा जित र १ मा हारसहित ४ अंकका साथ दोस्रो स्थानमा छ । कोशी २ खेलमा १ मा जित र १ मा हारसहित २ अंक्का साथ तेस्रो स्थानमा छ । ललितपुर ३ खेलमा जित विहीन हुँदै बाहिरिएको छ ।