एजेन्सी – पहिलो संस्करणको वुमन्स प्रिमियर लिग (डब्लूपिएल) को फाइनलमा आज दिल्ली क्यापिटल्स र मुम्बई इन्डियन्सबीच प्रतिस्पर्धा हुँदैछ । खेल नेपाली समय अनुसार बेलुका ७ः ४५ मा ब्रेबोन स्टेडियम मुम्बईमा हुनेछ।

दुबै टोली उपाधिका साथ इतिहास रच्ने सोचमा छन् । दिल्ली लिगमा ८ खेलमा ६ मा जित र २ मा हारसहित १२ अंकका साथ शीर्ष स्थानमा रहँदै सोझै फाइनलमा पुगेको थियो । मुम्बईले एलिमिनेटर खेलमा युपी वारियर्सलाई ७२ रनले हराउँदै फाइनलमा स्थान बनाएको थियो ।

दिल्लीको मेग ल्यानिङ र मुम्बईको हरमनप्रीत कौरले कप्तानी गर्नेछन् । दिल्ली र मुम्बईबीच फाइनलमा निकै कडा प्रतिस्पर्धा हुने अनुमान गरिएको छ । लिगको खेलमा दुबै टोली एक एक खेलमा विजयी भएका थिए । दुबै टोलीमा विश्वस्तरिय बलर, ब्याटर र अलराउन्डर छन् ।

दिल्लीमा ल्यानिङ, सफाली बर्मा र जेमिमाह रोड्रिगस जस्ता ब्याटर छन् । मारिजान कप्प, एलिस क्याप्से, जेस जानसन जस्ता अलराउन्डर छन् । उता मुम्बईमा हेली म्याथ्यु, नाट स्काइभर ब्रन्ट, अमेलिया केर र हरमनरप्रीत कौर जस्ता चर्चित खेलाडी टोलीमा छन् । युपीलाई हराउन इस्सी वाेंगले ह्याट्रिक लिएकी थिइन् ।

तीव्र गतिकी बलर इस्सी दिल्लीलाई घातक बन्न सक्छिन् । प्रतियोगितामा पाँच टोलीको सहभागीता थियो । डबल राउन्ड रोविनको आधारपछि दिल्ली सोझै फाइनलमा पुगेको थियो । दोस्रो स्थानमा रहेको मुम्बई र तेस्रो स्थानमा रहेको युपीबीच एलिमिनेटर खेल भएको थियो । बेंगलोर र गुजरात भने चौथो र पुछारमा रहँदै बाहिरिएका थिए ।