काठमाडौं (हाम्रो खेलकुद) – नेपाल एपिएफ क्लबकी कप्तान सीता रानामगरले अरुलाई मौका नदिएको भन्दा पनि आफैंलाई नेपालमा ओपनरको रुपमा फर्किनु पर्ने बताएकी छिन् । ललितपुर मयर्स वुमन्स च्याम्पियनसिप टि२० प्रतियोगितामा एपिएफको लगातार दुई जितमा दुबैमा प्लेयर अफ द म्याच चुनिएपछि सीताले उक्त प्रतिक्रिया दिएकी हुन् ।

एपिएफले पहिलो खेलमा मधेश प्रदेशलाई १० विकेट र दोस्रो खेलमा सुदूरपश्चिम प्रदेशलाई १५ रनले हरायो । दुवै खेलमा सीताले उत्कृष्ट ब्याटिङका साथ प्लेयर अफ द म्याच चुनिन् ।

‘हामीले ब्याटिङ गर्दा १ सय २० माथि गर्नुपर्छ भन्ने नै थियो । किनभने सुदूरपश्चिमको ब्याटिङ एकदमै राम्रोछ । पछिल्लो प्रधानमन्त्री कपमा हामीले ९१ रन बनाउँदा उनीहरुले सहजै पूरा गरेका थिए । हामीले १ सय २० को नै लक्ष्य बनाएर गएका थियौं’, सीताले जितपछि भनिन् ।

सुरुमा कविता कुँवरले दुई ओभर मेडन राखेकी थिइन् । सीता विकेट बचाएर खेल्न खोजेको बताउँछिन् । ‘खासमा म टिके भने रन हुन्छ भन्ने थियो । एक इनिङबाट मलाई सम्हालिनु पर्ने थियो । डट नै गएपनि पछि रिकभर गर्न सकिन्छ भनेर १० ओभर म खेल्नै पर्ने भनेर गएको थिए । डट खादा पनि सम्हाल्ले रै खेलेको हो,’ उनले भनिन् ।

सीता पहिलो खेलमा मधेशसँग ४५ रन र दोस्रो खेलमा ५२ रनमा अविजित रहिन् । दुबै खेलमा नट आउट रहेकी सीता करिअरको उत्कृष्ट लयमा देखिएकी छिन् ।

‘यत्रो मिहिनेत गर्दा गर्दै पनि आउटकम आई राखेको छैन । हाम्रोमा एउटा दुईवटा प्रतियोगिता हुन्छ । यहि खेल खेलेर मात्रै अन्तर्राष्ट्रियको लागि पनि आत्माविश्वास बढाउनुपर्छ । त्यो हुँदा पनि लयमा हुँदै राम्रो खेल्नुपर्छ भन्नेर केन्द्रित गरि राखेको छु’, उनले भनिन् ।

सीताले आफूलाई नेपालको ओपनरको रुपमा फर्किन राम्रो प्रदर्शन गर्नुपर्ने बताइन् । ‘मैले अरुलाई मौका नदिने भन्दापनि आफैंले पनि राष्ट्रिय टिममा लड्नुपर्ने छ । यसअघि मैले राष्ट्रिय टोलीबाट ओपनिङ पनि गर्न पाइँन । मलाई लाग्छ मैले घरेलु प्रतियोगितामा अरुलाई मौका दिदा त्यो हिसाबले पनि राष्ट्रिय टिममा ओपनिङ गर्न पाएन । राष्ट्रिय टिममा म कसरी ओपनिङ आउने भन्ने ले नै ओपनिङ खेलेको हो’, सीताले भनिन् ।

उमेर बढ्दै गएपछि खेलाडीहरुको प्रदर्शन घट्दै जान्छ । तर सीताले भने झन् राम्रो प्रदर्शन गर्दै गएकी छिन् । सीता आफूले खेल्न सम्म राम्रो गर्ने बताउँछिन् । ‘म जति खेल्छु राम्रो नै खेल्छु भनेर अभ्यास गई राखेको छु । एक पटक होईन दुई पटक दिनमा गएको छु । जति खेल्छु राम्रो भएर खेलम भन्ने भएको छ । किन अरुलाई भन्ने बाटो देउ भनेर जसरी हुन्छ म राम्रो खेल्नुपर्छ भनेर खेलेको हो’, उनले भनिन् ।

एपिएफले शनिबार दिउँसो दोस्रो खेलमा कोशी प्रदेशसँग खेल्नेछ । पाँच टोली सहभागी प्रतियोगिता चैत १६ सम्म टियु मैदानमा चल्नेछ । प्रतियोगितामा कोशी, एपिएफ, मधेश, सुदूरपश्चिम र ललितपुर-११ छन् ।