एजेन्सी – भारतीय क्रिकेट टोलीका विष्फोटक ब्याटर सूर्यकुमार यादव लगातार तीन खेलमा गोल्डेन डक आउट (पहिलो बलमै आउट) भएका छन् । अष्ट्रेलियासँगको तीन ओडिआई खेलमा सूर्य तीनै बलमा गोल्डेन डक आउट भएका हुन् ।

सूर्य पहिलो र दोस्रो खेलमा मिचेल स्टार्कको बलमा लगातार शून्यमा एलबीडब्लू आउट भएका थिए । तेस्रो खेलमा पनि पहिलो बलमै बोल्ड आउट भएका छन् । भारतले जितको लागि २ सय ७० रनको विजयी लक्ष्य पछ्याउनेक्रममा ३६ औं ओभरको दोस्रो बलमा सूर्य स्पिनर एश्टन अगरको बलमा बोल्ड आउट भएका हुन् ।

उनी भारतबाट ओडिआईमा लगातार तीन पटक डक आउट (शून्यमा आउट) हुने छैटौं खेलाडी हुन् । सचिन तेन्दुलकुर सन् १९९४, अनिल कुम्बले १९९६, जाहिर खान २००३/४, ईशान्त शर्मा २०१०/११ र जस्प्रित बुमराह २०१७/१९ मा लगातार तीन खेलमा गोल्डेन डक आउट भएका थिए ।

सूर्य तीन खेलको ओडिआई सिरिजमा तीनैमा गोल्डेन डक आउट हुने विश्व क्रिकेटकै पहिलो खेलाडी बनेका छन् । समग्रमा १३ खेलाडी लगातार तीन पटक ओडिआईमा डक आउट भएका छन् । अन्य खेलाडी भने पाँच देखि ७ खेलमा भएका थिए । सूर्यले इतिहासकै खराब कीर्तिमान बनाएका हुन् ।

टि२० क्रिकेटमा सानदार प्रदर्शन गरेका सूर्य ओडिआईमा जम्न सकेका छैनन् । ३२ वर्षीय उनले ४८ टि२० आई खेलमा ३ शतक र १३ अर्धशतकसहित कुल १ हजार ६ सय ७५ रन बनाएका छन् ।

२३ ओडिआई खेलमा २ अर्धशतक बनाउँदै ४ सय ३३ रन मात्रै बनाएका छन् । यो खराब प्रदर्शनसँगै सूर्यले आगमी अक्टोबर नोभेम्बरमा घरेलु मैदानमा हुने एकदिवसीय विश्वकपमा स्थान बनाउने सम्भावना कठिन बनेको छ ।