काठमाडौं (हाम्रो खेलकुद) – नेपालले आइसिसी विश्वकप लिग–२ र आफ्नो ओडिआई क्रिकेटमा नयाँ इतिहास रचेको छ । नेपालले आइतबार युनाइटेड अरव इमिरेट्स (युएई) लाई १ सय ७७ रनको फराकिलो अन्तरले हराउँदै नयाँ कीर्तिमान बनाएको हो ।

यो जित रनको हिसाबमा नेपालले हात पारेको आफ्नो ओडिआई इतिहासको सर्वाधिक ठूलो हो । यसअघि नेपालले २०२१ मा पपुवा न्युगिनीविरुद्ध अल अमरेतमा १ सय ५१ रनले पराजित गरेको थियो । त्यस्तै २०१९ मा युएईलाई नै १ सय ४५ रनको फराकिलो अन्तरले हराएको थियो ।

यी तीन जित नै नेपालले ओडिआईमा रनको हिसाबमा हात पारेका सर्वाधिक ठूला जित हुन् । विकेटको हिसाबमा भने नेपालले अमेरिकालाई २०२० मा ८ विकेटले हराएको थियो । नेपालको मात्रै होईन आइसिसी विश्वकप लिग-२ कै सर्वाधिक फराकिलो जित हो ।

लिग-२ मा नेपालले नामिबियाको कीर्तिमान तोडेको हो । यसअघि नामिबियाले २०२२ मा पिएनजीलाई १ सय ६७ रनको फराकिलो अन्तरले हराएको थियो । त्यो नै लिग २ को सर्वाधिक ठूलो जित रहँदै आएको थियो । गतवर्ष स्कटल्यान्डले पिएनजीलाई १ सय ६२ रनले हराएको थियो ।

२०१९ मा नामिबियाले अमेरिकालाई १ सय ३९ रनले हराएको थियो । नेपालले सोमबार पपुवा न्युगिनी र बिहीबार युएईसँग खेल्नेछ । दुवै खेलमा विजयी भएमा सोझै विश्वकप छनोट खेल्न पाउनेछ । पराजित भएमा क्वालिफायर प्लेअफ खेल्नुपर्छ । युएईमाथिको जितसँगै आगमी चार वर्षको लागि ओडिआई मान्यता भने पक्का गराएको छ ।

जितको लागि २ सय ४९ रनको विशाल विजयी लक्ष्य पछ्याएको युएई २२.५ ओभरमा ७१ रनमा अल आउट भयो । युएईका आयन खानले ३३ बलमा २ चौका र २ छक्कासहित सर्वाधिक रन बनाए ।

युएईलाई ७१ रनमा अल आउट गर्न बायाँ हाते स्पिनर ललितनारायण राजवंशीले ७.५ ओभरमा २ मेडनसहित २० रन खर्चेर ५ विकेट लिए । ललितको यो करिअरको उत्कृष्ट प्रदर्शन हो ।