काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत आइतबार युनाइटेड अरव इमिरेट्स (युएई) सँग खेल्दैछ । खेल बिहान ९ : ३० मा टियु क्रिकेट मैदानमा सुरुहुनेछ ।

घरेलु टोली नेपाल आफ्नो उच्च लयलाई निरन्तरता दिँदै युएईलाई हराउँदै आगमी चार वर्षको लागि ओडिआई मान्यता पक्का गर्न चाहन्छ । नेपाल ३३ खेलमा १६ मा जित र १५ मा हारसहित ३४ अंकका साथ पाँचौं स्थानमा छ । अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ ।

नेपालले यदि आइतबार युएईलाई हराउँदा ३६ अंकका साथ चौथो स्थानमा उक्लिनेछ । बाँकी दुवै खेलमा पराजित भएपनि नेपाल शीर्ष पाँचमा रहँदै सोझै ओडिआई मान्यता बचाउनेछ । त्यसैले नेपालको लक्ष्य युएईलाई हराउँदै ओडिआई मान्यता पक्का गर्ने हुनेछ ।

यता युएई ३३ खेलमा १४ मा जित र १६ मा हारसहित ३१ अंकका साथ छैटौं स्थानमा हुनेछ । युएईलाई शीर्ष पाँचमा रहँदै ओडिआई मान्यता जोगाउन बाँकी तीनै खेल जित्नुपर्ने हुन्छ । नेपालसँग पराजित भएमा ओडिआई मान्यता सोझै प्राप्त गर्ने अवसर निकै कठिन बन्नेछ । नेपालसँग पराजित हुँदा ओडिआई बचाउन युएईले बाँकी दुई खेलमा अप्रत्याशित फराकिलो जित हात पार्नुपर्ने हुन्छ ।

यता नेपालले पछिल्ला ९ मध्य ८ खेलमा जित हात पारेको छ । पछिल्ला पाँच घरेलु मैदानमा नेपाल पराजित भएको छैन । उता युएईले पछिल्ला १० खेलमा २ मा मात्रै जित हात पारेको छ । नेपाललाई सोझै विश्वकप छनोट खेल्न बाँकी तीनै खेल जित्नुपर्ने हुन्छ । युएई भने शीर्ष तीन दौडबाट बाहिरिएको छ ।

अव विश्वकप छनोटमा स्थान बनाउन क्वालिफायर प्लेअफ खेल्नुपर्ने हुन्छ । नेपालले पछिल्लो खेलमा पपुवा न्युगिनीलाई ५२ रनले पराजित गरेको थियो । उक्त खेलमा आसिफ शेखले १ सय १० रनको शतकीय इनिङ खेलेका थिए ।

ओपनर कुशल भुर्तेल र आसिफले पहिलो विकेटका १ सय १० रनको सानदार शतकीय साझेदारी गरेका थिए । नेपालको बलिङमा कुनै परिवर्तनको सम्भावना छैन । स्पिनर सन्दीप लामिछाने, तीव्र गतिका बलर करण केसी र सोमपाल कामी प्रमुख बलरको रुपमा रहनेछन् ।

ज्ञानेन्द्र मल्लको प्रदर्शन टिमको लागि चिन्ताको विषय बनेको छ । तर नेपालले ज्ञानेन्द्रलाई थप विश्वास गर्ने देखिन्छ । त्यसैले नेपालको टोलीमा परिवर्तनको सम्भावना कम देखिन्छ ।

यता युएईको मध्यक्रम ब्याटिङ निकै खराब रहँदै आएको थियो । मध्यक्रम सुधारको लागि अर्यांश शर्मालाई डेब्यू दिनसक्छ । मोहम्मद वासिम र वृत्य अरविन्दबाट युएई राम्रो प्रदर्शन चाहन्छ । मध्यक्रममा रोहन मुस्तफाको प्रदर्शन महत्वपूर्ण हुनेछ ।

उता ओपनर आसिफ खानले नेपालविरुद्ध पछिल्ला दुई इनिङमा ७२ र ८२ रनको इनिङ खेलेका थिए । त्यसैले आसिफबाट नेपाल बच्नुपर्ने हुन्छ । तीव्र गतिका बलर जहुर खान र जुनैद सिद्दिक प्रमुख बलर हुन् । आयन खान अफ्जल प्रमुख स्पिनरको रुपमा रहनेछन् ।

हेड टु हेड :

नेपाल र युएईबीच ११ ओडिआई खेल भएको छ । जसमा नेपाल ५ खेलमा जित र ६ खेलमा पराजित भएको छ । नेपालले लिग २ मा युएईसँग चार खेल खेल्दा एक खेलमा मात्रै हराएको छ । पछिल्ला पाँच खेलमा नेपालले तीन खेलमा हराएको छ ।

युएईको टोली :

मोहम्मद वासिम (कप्तान), आयन खान, आर्यन लक्रा, अश्वन्त वल्थापा, आसिफ खान, अर्यांश शर्मा, सिपी रिजवान, हजरत बिलाल, जुनैद सिद्धिक, कार्तिक मयाप्पन, रोहन मुस्तफा, वृत्य अरविन्द, जहुर खान र जवार फरिद ।

नेपालको टोली :

रोहित पौडेल (कप्तान), दीपेन्द्रसिंह ऐरी, ज्ञानेन्द्र मल्ल, आसिफ शेख, करण केसी, सोमपाल कामी, कुशल भुर्तेल, ललितनारायण राजवंशी, भीम सार्की, कुशल मल्ल, सन्दीप लामिछाने, गुलशन झा, आरिफ शेख र प्रतिश जि.सी. ।

अंक तालिका

स्कटल्यान्ड ३६ खेलमा २४ मा जित र १० मा हारका साथ ५० अंकका साथ शीर्ष स्थानमा रहँदै च्याम्पियन बन्यो। ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा छ । नामिबिया ३६ खेलमा १९ मा जित र १६ मा हारका साथ ३९ अंकका साथ तेस्रो स्थानमा छ ।

अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । नेपाल ३३ खेलमा १६ मा जित र १५ मा हारसहित ३४ अंकका साथ पाँचौं स्थानमा छ । युएई ३३ खेलमा १४ मा जित र १६ मा हारसहित ३१ अंकका साथ छैटौं स्थानमा छ । पपुवा न्युगिनी ३४ खेलमा ५ मा जित र २८ मा हारसहित ११ अंक जोड्दै पुछारमा छ।