काठमाडौं (हाम्रो खेलकुद) – पपुवा न्युगिनीका आक्रामक ओपनर टोनी उरा घाइते भएका छन् । आइसिसी विश्वकप लिग–२ त्रिकोणात्मक ओडिआई सिरिज अन्तर्गत युएईसँग खेल्नुअघि टोनी उरा घाइते भएका हुन्।

टोनी उरा शुक्रबार बिहान अभ्यासकोक्रममा घाइते भएका हुन् । उनको दायाँ खुट्टामा चोट लाग्न पुगेको थियो । त्यसपछि उनको थप स्वास्थ्य परिक्षणको लागि नेशनल अस्पताल कंलकी लगिएको थियो ।

उरा पिएनजीको प्लेइङ-११ मा थिए । तर उनी खेल्न नसक्ने भएपछि बेन्चमा रहेका विकेटकिपर हिला भारेलाई पिएनजी युएईविरुद्ध ब्याटिङ गराएको थियो । उरा उपचार गरेर टियुमा खेलाडीसँग पेभेलिएन बक्समा रहेका छन् ।

टोनी उरा घाइते भएपछि पिएनजीले युएईविरुद्ध हिरि हिरिलाई ओपनिङ गराएको थियो । हिरिले ८५ बलमा ५ चौका र ४ छक्कासहित ७७ रनको इनिङ खेलेका थिए ।

टोनी उराले आगमी खेल खेल्न सक्ने वा नसक्ने पिएनजीले जनाएको छैन । तर खुट्टाको चोटको कारण खेल्न सक्ने कम सम्भावना देखिन्छ । पिएनजीले अव सोमबार नेपाल र बुधबार युएईसँग खेल्नेछ । उरा खेलको लागि उपलब्ध नभएमा पिएनजीलाई ठूलो घाटा लाग्नेछ ।

३३ वर्षीय उराले ५६ ओडिआई खेलमा १ शतक र ५ अर्धशतकसहित १ हजार २ सय २६ रन बनाएका छन् । उराले विहीबार नेपालविरुद्ध पहिलो खेलमा ४४ बलमा ९ चौकासहित ५० रन जोडेका थिए । उराको करिअरको उत्कृष्ट प्रदर्शन १ सय ५१ रन छ । उक्त प्रदर्शन २०१८ मा आयरल्यान्डविरुद्ध खेलेका थिए ।