एजेन्सी – भारतीय क्रिकेट बोर्डले पहिलो पटक आयोजना गरेको वुमन्स प्रिमियर लिग (डब्लूपिएल) मा मुम्बई इन्डियन्स वुमन्स टोलीले उद्धघाटन खेलमा गुजरात जायन्ट्स वुमन्सलाई १ सय ४३ रनको फराकिलो अन्तरले हराउँदै सानदार विजयी सुरुवात गरेको छ ।

जितको लागि २ सय ८ रनको विशाल विजयी लक्ष्य पछ्याएको गुजरात १५.१ ओभरमा ६४ रनमा अल आउट भयो । गुजरातको लागि दयालन हेमलताले २३ बलमा १ चौका र २ छक्कासहित सर्वाधिक २९ रन बनाइन् । मोनिका पटेलले १० रन जोडिन् ।

अन्य कुनैपनि ब्याटरले दोहोरो अंकमा रन बनाउन सकेनन् । कप्तान बेथ मुनीसहित चार खेलाडीले खाता खोल्न सकेनन् ।
मुम्बईकी साइका इशाकले ३.१ ओभरमा ११ रन खर्चेर सर्वाधिक चार विकेट लिइन् । नाट स्काभर ब्रन्ट र अमेलिया केरले दुई दुई विकेट लिए ।

त्यसअघि डिवाइ पाटिल स्पोर्ट्स एकेडेमीमा टस हारेर पहिला ब्याटिङ थालेको मुम्बईले निर्धारित २० ओभरमा ५ विकेट गुमाउँदै २ सय ७ रन बनायो । मुम्बईको लागि कप्तान हरमनप्रीत कौरले ३० बलमा १४ चौकासहित सर्वाधिक ६५ रनको इनिङ खेलिन् ।
अमेलिया केर २४ बलमा ६ चौका र १ छक्कासहित ४५ रनमा अविजित रहिन् ।

शीर्षक्रमकी ब्याटर हेली म्याथ्युज ३१ बलमा ३ चौका र ४ छक्कासहित ४७ रनमा आउट भइन् । गुजरातकी स्नेहा रानाले सर्वाधिक दुई विकेट लिइन् । प्रतियोगितामा पाँच फ्रेन्चाइज टोलीको सहभागीता छ ।