एजेन्सी – भारतीय तीव्र गतिका बलर जस्प्रित बुमराहले इन्डियन प्रिमियर लिग (आइपिएल) २०२३ गुमाउने भएका छन् । मुम्बई इन्डियन्सका प्रमुख बलर बुमराहले ढाँडको शल्यक्रियाको कारण बुमराहले आइपिएल २०२३ गुमाउने भएका हुन् ।

बुमराहले गतवर्ष टि२० विश्वकप पनि चोटका कारण गुमाएका थिए । यदि भारत आइसिसी विश्व टेस्ट च्याम्पियनसिप २०२३ को फाइनल खेलेको खण्डमा उनले उक्त खेल पनि गुमाउने छन् ।

बुमराहले आगमी अक्टोबर नोभेम्बरमा घरेलु मैदानमा हुने एकदिवसीय विश्वकपमा फर्किन सक्ने अनुमान गरिएको छ । ब्याक इन्जुरीको कारण बुमराहले गतवर्ष अगष्टमा एसिया कप गुमाएका थिए ।

त्यसपछि उनी टि२० विश्वकप टोलीमा थिए । बुमराहले सेप्टेम्बरमा घरेलु मैदानमा अष्ट्रेलियाविरुद्ध दुई टि२० आई खेल पनि खेलेका थिए । त्यसपछि उनी विश्वकपबाट बाहिरिन पुगेका थिए । बुमराहले अन्तिम पटक २०२२ सेप्टेम्बर २५ मा अष्ट्रेलियाविरुद्ध टि२० आई खेल खेलेका थिए ।

त्यसपछि बुमराहले कुनैपनि क्रिकेट खेल खेलेका छैनन् । उक्त अन्तिम खेलमा बुमराहले ४ ओभरमा ५० रन खर्चिएका थिए । बुमराह २०१६ देखि भारतका सर्वाधिक भरपर्दा बलर हुन् । विश्व क्रिकेटमै सटिक योर्करका लागि चिनिन्छन् ।

उनी टोलीबाट बाहिरिदा मुम्बईलाई पनि ठूलो घाटा लाग्नेछ । मुम्बईमा जोफ्रा आर्चर, जेसन बेहरनडोफ, झेय रिचर्डसन, अर्जुन तेन्दुलकर र डुआन यानसन जस्ता तीव्र गतिका बलर छन् । क्यामरन ग्रीन अलराउन्डरको रुपमा खेल्नेछन् । आइपिएल २०२३ आगमी मार्च ३१ देखि सुरु हुनेछ ।

मुम्बईले अप्रिल २ मा रोयल च्यालेन्जर्स बेंगलोरविरुद्ध खेल्दै सुरुवात गर्नेछ । पाँच पटकको च्याम्पियन मुम्बई गतवर्ष भने पुछारमा रहँदै बाहिरिएको थियो ।